30 верасня 1931 г нарадзіўся Ніл Гілевіч, таленавіты паэт, патрыёт, а таксама шчыры і разумны чалавек. Вось яго завет нам, сучасным беларусам:

Новы век азарыў небасхіл.
«Чый ён будзе?» – прарокі гамоняць.
Будзе наш – калі выстарчыць сіл
У цябе, беларуская моладзь!

Значыць, трэба па долю ісьці
Зь цьвёрдай верай, што вёрсты ня змораць.
Дык ня страць, не ўступі, не ўпусьці
Гэты шанц, беларуская моладзь!

Хай за зданьню пачварыцца здань –
Сілу волата цені ня зломяць.
Час прабіў: уздыміся і стань
У шыхты, беларуская моладзь!

Веру: выпаўзьні з чорнай начы
Дух твой вольны на здраду ня змовяць.
Раздрузгоч, раскрышы і зьмяці
Іх кубло, беларуская моладзь!

Помні: волю ў змаганьні бяруць,
А ня просяць, ня кленчаць, ня моляць.
Толькі ты зьберажэш Беларусь!
Толькі ты, беларуская моладзь!

2002 г.

Жыве Беларусь!