🍎🏃📚✏️
 
✍️همت شهبازی
 
بیرینجی شاه‌عباس صفوی‌ (۱۵۷۰–۱۶۲۹)
 
توٌرکجه شعرلر
 
بیرینجی شاه عباس‌ین (حاکمیّت ایللری: ۱۵۸۷–۱۶۲۹) توٌرکجه شعرلری گؤرکملی ادبیّاتشناس عالیم #سلمان‌ممتاز ین شخصی آرشیویندن گؤتورولموشدور. س. ممتاز معلومات وئریر کی، بیرینجی شاه عباسین آذربایجان توٌرکجه‌سینده شعرلری عروض و هئجا وزنلرینده یازیلمیشدیر. شعرلرینده عباس و شاه‌عباس تخّلص‌لریندن استفاده ائتمیشدیر.
 
 
۱
دردی اوْلانین همیشە درمان بیله‌سینجە
کوٌفری‌اوْلانین نه گزه‌ر ایمان بیله‌سینجە
 
کافیر اوْلانین مسکنی فی‌النار سقر‌دیر
مؤمن اوْلانین جنت رضوان بیله‌سینجە
 
بوٌلبول‌لر اوْخور شام و سحر باغ آراسیندا
گوٌللر آچیلیر سوٌنبول و ریحان بیله‌سینجە
 
حوٌسنون کتابی نور تجلّا یازولوبدور
آچدیم اوْخودوم سوره‌‌ رحمان بیله‌سینجە
 
بغدادی آلور، بیل، اوْ شاه‌عباس‌حسینی
طوّافه گلور اوْل شه مردان بیله‌سینجە
 
 
۲
 
دلبَر، سنینله مئی‌لر ایچَه‌لوم،
بو دوٌنیا کیمسه‌یه قالماز، افندیم.
بو فانی دونیادا لذّت چکه‌لوم،
بو دوٌنیا کیمسه‌یه قالماز، افندیم.
 
دونیانین، بیل، آدی فانی‌دیر، فانی،
بئش‌گوٌن قوْناق ساخلار آنجاق اینسانی
تختیندن اَندیرمیش چوْخ سلیمانی،
بو دوٌنیا کیمسه‌یه قالماز، افندیم.
 
بایقوشلار مَسکَنی چؤلدور اَزَلدَن،
بوٌلبولین دلبَری گوٌلدور اَزَلدَن،
آتالاردان قالما یوْلدور اَزَلدَن،
بو دوٌنیا کیمسه‌یه قالماز، اَفَندیم.
 
دوٌنیانین بیر آدی قورو قَفَسدیر،
اوْنا کؤنول باغلاماق تام عبث‌دیر،
بو سؤزو سؤیله‌ین شاه عبّاس‌دیر،
بو دوٌنیا کیمسه‌یه قالماز، اَفَندیم
 
۳
 
تا بادَه‌یِ خؤشگُوار وار، ائی ساقی
بیر دَم مَنی قویما هُوشیار، ائی ساقی
دوْلدور قَدَحی کی، دَوری دؤنموش دؤوران
نَه بادَه قوْیار، نَه بادَه‌خور، ائی ساقی
╭•••••••••••••••••••••• ••••••••••╮
╰➤@chgrmn
                                                 #تورکجه_دانیش_ائلنن_باریش                                                                                    
                                                  #تورکجه_یازاق_ائلنن_قالاق                                                                             
                                                  #کیملیییمیزه_بیرگه_دالاق
╰••••••••••••••••••••••••••••••••╯