🍎🏃📚✏️
 
90-جى درس
 
فعللر (19)
فعللرده بيتيشن شخص تایلیقلاری (فعلده شخص آنلاييشى):
هر ايش و حركت بللى بير شخص و شئى طرفيندن ايجرا اوْلونماليدير. نئجه كى ايش زامانسيز اوْلماز, شخص سيز ده اوْلماز. هر فعل صرف اولاندا اونلارين سوْنوندا, شخصى بللنديرن, بللى شكيلچيلر واردير. مثلا "يازديم" فعلينده "ياز" فعلين كؤكو, "دى" شهودى كئچميش زامان اکی و "م" بيرينجى شخص تك علامتيدير و بيلديرير كى, ايش "منيم" طرفيمدن گؤرولموشدور.
صرف زامانى فعللرين سوْنونا قوْشولان و موختليف شخصلرى بيلديرن اکلره بيتيشن شخص تایلیقلاری دئييلير.
بيتيشن شخص تایلیقلاری آشاغيداكيلاردان عيبارتدير:
1. بيرينجى شخص تك:
بيرينجى شخص تكين اساس علامتى "م" دير كى,فعلين بوٌتون زامانلارى, نوعلارى و شكيللرينده ايشله نير.
1. بو علامت فعلين شهودى كئچميش(يازديم), شرطى (يازسام) و التزام-آرزى شكلينده (گرك يازام) يالنيز "م" حرفى اوْلار.
2. فعلين نقلى كئچميش, اينديكى زامان, قطعى و غير قطعى گلجه يينده, هابئله لازيم و واجيب فورمالاريندا, همين اک "آم-أم" شكلينده اوْلار: يازميشام, يازيرام, يازاجاغام, يازارام, يازاسييام, يازمالييام, ....
3. فعلين لازيم (يازاسى) و واجيب (يازمالى) شكيللرى سسلى ايله بيتر, بونا گؤره ده, ايكى سسلينى بيرى بيريندن آييرماق اوٌچون, "آم-أم" شكيلچيسى ايله فعلين آراسيندا بير "ى" سسسيزى ده آرتيريلار:يازاسييام, يازمالييام, گلمه لى يم, ...
4.امرين بيرينجى شخص تكينده:
الف) اگر فعلين كؤكو سسسيزله قورتارسا, دؤرد چئشيدلى "يم (im), يٌم (ιm), وم (um), وٌم (üm)" اکلرى ايشله نر: يازيم, گليم, سوروم, ...
ب) اگر فعلين كؤكو سسلى ايله قورتارسا, ايكى سسلينى بيرى- بيريندن آييرماق اوٌچون, كؤكله اکلر آراسيندا بير "ى" سسسيزى ده آرتيريلار: دئييم, آنلاييم, توخويوم, ...
قایناق : سس ، صرف کیتابی پروفسور زهتابی-تخلیص ائدن ، سارای خانیم
 
╭•••••••••••••••••••••• ••••••••••╮
╰➤@chgrmn
                                                 #تورکجه_دانیش_ائلنن_باریش                                                                                    
                                                  #تورکجه_یازاق_ائلنن_قالاق                                                                             
                                                  #کیملیییمیزه_بیرگه_دالاق
╰••••••••••••••••••••••••••••••••╯