🍎🏃📚✏️
 
85-جی درس
 
فعل (14)
فعللرده زامان:
*کئچميش زامان
* نقلى كئچميش:
شهودى كئچميشده خبر وئرن اؤزو ايشين ايجراسينين شاهيدى اوْلموشدور, آنجاق نقلى كئچميشده بئله دَييلدير و خبر وئرن اؤزو اوْنون شاهيدى اوْلماميشدير و يالنيز ايشين نتيجه سينى بيلديرير.
مسئله نين تام آيدين اوْلماسى اوٌچون آشاغيداكى ايضاحلارا فيكير وئرمه ليييك:
"من يازميشام", "سن يازميسان", "اوْنلار يازميش" جومله لرينه فيكير وئرك. خبر وئرن ايكينجى و اوٌچونجو شخصلرده ايشين ايجراسينا شاهيد اوْلماميشدير, اوْنا گؤره جومله لر نقلى شكيلده دئييلير. آنجاق "من يازميشام" جومله سينده ايشى گؤرن "من" اؤزودور, بوندا شوبهه يوْخدور. آنجاق اوْنو دينله ين طرفلر (ايكينجى و اوٌچونجو شخصلر) ايشين ايجراسينا شاهيد اوْلماميشلار بونا گؤره بيرينجى شخص نقلى شكيلده خبر وئرمه یه مجبوردور.
نقلى كئچميشده ايش كئچميشده باش وئرسه ده, اوْنون اثرى خبر وئريلن زامانا قدر, اينديكى زامانا قدر قالماقدادير.
نقلى كئچميشين غئير شهودى نوعلارى دا واردير: من يازميشام. من يازميش ايمشام.
"شهودى كئچميش" له "نقلى كئچميش"ين فرقینی بيلمك اوٌچون قئيد ائتمك اوْلار كى, بيرينجيده شهوديليك, قطعى ليك آنلامى و معناسى اوْلدوغو اوٌچون, اوْنلارا كؤمكچى "ايدى" و "ايميش" فعللرى قوْشماق و مركب فعللر ياراتماق اوْلماز, آنجاق نقلى كئچميشده قيسما غيرشهودى, غير قطعى ليك آنلامى حؤكم سوٌردوگو اوٌچون, اوْنلارا كؤمكچى "ايدى" و "ايميش" فعللرينى قوْشوب, مركب فعللر ياراتماق اوْلار: گلميش ايديم, گلميش ايدى, ...
نقلى كئچميشين معاصير ديليميزده علامتی دؤرد چئشيدلى "ميش 4" دير.
قديم دؤورلردن بو گوٌنه قدر ايكينجى و اوٌچونجو شخصلرده يوخاريدا گلن شكيلچيلرين يئرينه دؤرد چئشيدلى "يب 4" شكيلچيسينى ده ايشلدرلر: يازيبسان, يازيبدير, ...
نقلى كئچميش صرفى:
* تصديق:
من اوْخوموشام,
سن اوْخوموشسان=اوْخويوبسان=اوْخوموسان, اوْ اوْخوموش(دور), اوْخويوب(دور),
بيز اوْخوموشوق,
سيز اوْخوموشسوز(نوز) = اوْخويوبسوز(نوز), اوْنلار اوْخوموشلار = اوْخويوبلار.
* اينكار:
من اوْخوماميشام,
سن اوْخوماميشسان = اوْخوماييبسان =اوْخوماميسان,
اوْ اوْخومامیش(دير), اوْخوماييب(دير),
بيز اوْخوماميشيق,
سيز اوْخوماميشسيز(نيز) = اوْخوماييبسيز(نيز),
اوْنلار اوْخوماميشلار = اوْخوماييبلار.
قایناق : سس ، صرف کیتابی پروفسور زهتابی-تخلیص ائدن ، سارای خانیم.
 
╭•••••••••••••••••••••• ••••••••••╮
╰➤@chgrmn
                                                 #تورکجه_دانیش_ائلنن_باریش                                                                                    
                                                  #تورکجه_یازاق_ائلنن_قالاق                                                                             
                                                  #کیملیییمیزه_بیرگه_دالاق
╰••••••••••••••••••••••••••••••••╯