🍎🏃📚✏️
84-جو درس
فعل (13)
فعللرده زامان:
ایش و یا حرکت زامان خاریجینده اوْلا بیلمز. فعل زامان سیز اوْلماز. زامان فعله مخصوصدور. زامان یا کئچميش, يا ايندى و يا گله جك اوْلا بيلر. زامان ايكى ايش آراسينداكى (ایندی و ایشین ایجرا واختی) زامانى معين لشديرير. بو اوْ دئمكدير كى, موختليف زامانلار يالنيز اينديكى زامانلا بيلينر, بونسوز كئچميش و گله جك زامانى تعيين ائتمك اوْلماز. كچئميش و يا گله جك زامانلار آنجاق اينديكى زامانا نيسبت كئچميش و يا گله جك ساييلير.
ديليميزده موختليف زامانلار بير سيرا شكيلچيلر واسيطه سيله بلله نر كى, فعللرين كؤكلرينه قوْشولار. بو شكيلچيلر آشاغيداكيلاردان عيبارتدير:
1. كئچميش زامان:
بو زامان ايش و حركتين كئچميشده باش وئرديگينى بيلديرير. كئچميش زامانين چئشيدليليگى باخيميندان, ديليميز دونيانين ان قدرتلى و زنگين ديللريندن بيريدير. عاليملريميز گؤستريرلر كى, ديليميزده ايگيرمى دؤرده قدر موختليف معنالى كئچميش زامان واردير. كئچميش زامانين ان چوخ ايشلنن و اؤنمليلرى بونلاردير:
الف) شهودى كئچميش (ماضى مطلق)
ب) نقلى كئچميش (ماضى نقلى)
ج) داواملى کئچميش (ماضى استمرارى)
د) اوزاق كئچميش (ماضى بعيد)
الف) شهودى كئچميش:
بو كئچميش زامان ايشين كئچميشده باش وئريب قورتارديغينى بيلديرر. بورادا خبر وئرن اؤزو ايشين ايجراسينين شاهيدى اوْلموش و ايندى اوْندان خبر وئرير.
اوْنون شكيلچيلرى دؤرد چئشيدلى "دى (di), دى (dı), دو (du), دو (dü)"دن عيبارتدير كى, فعلين كؤكونه قوْشولار: آچدى, گلدى, ووردو, گؤردو. بو كئچميش زامانين اينكار علامتى "ما-مه" دير كى, واسيطه سيز فعلين كؤكونه قوشولار: آچمادى.
آشاغيدا شهودى كئچميشين صرفى گليب:
*تصديق:
من اوْخودوم, سن اوْخودون, اوْ اوْخودو, بيز اوْخودوق, سيز اوْخودونوز (اوخودوز), اوْنلار اوْخودولار.
*اينكار:
من اوْخومادیم, سن اوْخومادين, اوْ اوْخومادى, بيز اوْخوماديق, سيز اوْخومادينيز (اوخوماديز), اوْنلار اوْخومادیلار.
قایناق : سس ، صرف کیتابی پروفسور زهتابی-تخلیص ائدن ، سارای خانیم
╭•••••••••••••••••••••• ••••••••••╮
╰➤@chgrmn
#تورکجه_دانیش_ائلنن_باریش
#تورکجه_یازاق_ائلنن_قالاق
#کیملیییمیزه_بیرگه_دالاق
╰••••••••••••••••••••••••••••••••╯
Post #5481
21