🍎🏃📚✏️
63-جو درس
تایلیقلار (5)
2. ايشاره تایلیقلاری
ايشاره تایلیقلاری منشأ اعتيبارى ايله شخص تایلیقلاریندان ده قديم دير. بو تایلیقلارین جوٌمله ايچينده كى وظيفه لرى شخص تایلیقلارینين وظيفه لريندن اوٌستوندور. باشقا تایلیقلار يالنيز موختليف نيطق حيصه لرينى دييشير و اوْنلارين يئرينده موختليف وظيفه لر داشييیر. آنجاق بو تایلیقلار بوٌتون بو وظيفه لردن باشقا, هئچ بير نيطق حيصه سينى دَييشمه دن, تعيين ليك وظيفه سى داشييير. ديليميزده ان چوْخ ايشلنن ايشاره تایلیقلاری بونلاردير:
بو, او, بئله, ائله, همين, هامان.
بو سؤزلر اوْندا حقيقى تایلیق اوْلا بيلر كى, جوٌمله ده اشيانين يئرينى توتسونلار, جمع اوْلا بيلسينلر, حاللانا بيلسينلر, جوٌمله نين مبتداسى(اؤزنه سی), خبرى(یوٌکلَمی) و تامامليغى اوْلا بيلسينلر. بوٌتون ديللرده اوْلدوغو كيمى "بو, اوْ" تایلیقلاری اوٌچونجو شخص تك, شخص تایلیقلارینين عئينى دير.
"بو-اوْ" ايشاره تایلیقلاری نين, "اوْ" شخص عوضليیى كيمى, ايسيملر كيمى حاللانماسيندا معين فرق واردير, اوْ دا بوندان عيبارتدير كى, بو تایلیقلاردا بوٌتون حاللاردا "ن" آرتيريلير:
بو, بونون, بونا, بونو, بوندا, بوندان.
اوْ, اوْنون, اوْنا, اوْنو, اوْندا, اوْندان.
بير سيرا ديللرده اوْلدوغو كيمى, بو تایلیقلار ايسيملرين اوّلينه گليب, اوْنلارى تعيين ائدير, آنجاق اوْنو كئيفيت جهتدن, يعنى صيفت كيمى يوْخ, بلكه اوْنو باشقالاريندان سئچديرير: اوْن ايلدير كى, همين يئرده ياشاييرام.
ايشاره تایلیقلاریلا صيفتلرين واحيد جهتلرى و فرقلى خصوصيتلرى واردير. واحيد جهتلرى بونلاردير:
1. بونلارين هر ايكيسى ايسيمدن قاباق گليب, اوْنلارى تعيين ائدر:
ياخشى شعرى هامى سئور. بو شعرى چوْخلارى سئوير.
بو جوٌمله لرده "ياخشى" و "بو" سؤزلرينين هر ايكيسى عئينى وظيفه داشييير و هر ايكيسى عئينى سواللارا جاواب وئرير: "نئجه؟ نه جور؟ هانسى؟"
2. بونلارين هر ايكيسى ايسيمله بيرليكده ايشلنديكده حال, جمع و خبر شكيلچيلرينى آلا بيلمز, آنجاق تكليكده ايشلنديكده اوْنلارين هاميسينى قبول ائده بيلر:
بئله لرى, بئله لرينى, هامانلاردان, بونلارينكى, اوْنونكوندا, ...
ياخشيلارى پيسلردن آييرماق لازيمدير. اونلارين ايشلرين بونلاردان فرقليدير...
بونلارى بيرى بيريندن آييران جهتلر بونلاردير:
1. ايشاره تایلیقلاری ايشاره بيلديرير, بير حالدا كى صيفتلر علامت و كئيفيت بيلديرير.
2. صيفت اشيانين علامت و كئيفيتينى بيلديريرسه, ايشاره تایلیقلاری اشيانى باشقالاريندان فرقلنديریب, اوْنلارى باشقالاريندان آييرير.
قایناق : سس ، صرف کیتابی پروفسور زهتابی-تخلیص ائدن ، سارای خانیم
╭•••••••••••••••••••••• ••••••••••╮
╰➤@chgrmn
#تورکجه_دانیش_ائلنن_باریش
#تورکجه_یازاق_ائلنن_قالاق
#کیملیییمیزه_بیرگه_دالاق
╰••••••••••••••••••••••••••••••••╯
Post #5216
27
- ❤ 1