🍎🏃📚✏️
 
59-جو درس
تایلیقلار (ضمیرلر) (1)
بیر متنده ایشلنن بیر ایسیم ایکینجی دفعه ایشلننده, ایسیمین تایینا(عوضینه) "من, سن, او, بیز, سیز, اوْنلار" سؤزلريندن بيرينى ايشلدرلر. بئله سؤزلره تایلیق /عوضليك و يا ضمير دئيرلر. وظيفه لرينه گؤره تایلیقلار نئچه يئره بؤلونور:
1. شخص تایلیقلارى
2. ايشاره تایلیقلارى
3. سوال تایلیقلارى
4. غيرمعين تایلیقلارى
5. تعيين تایلیقلارى
 
1. شخص تایلیقلاری:
بو عوضلیکلر بیرینجی, ایکینجی, اوٌچونجو (تک, جمع) شخصلری بیلدیرر. بو تایلیقلار مضمون و معنالارینا گؤره اوٌچ جوردور و هاميسى ايسيم كيمى "كيم؟" و يا "نه؟" سوالينا جاواب وئرر:
الف) اساس شخص تایلیقلارى: بو تایلیقلار بيرينجى,  ايكينجى و اوچونجو شخصین تک و جمعینی بیلدیریر. بو تایلیقلار بونلاردیر:  من (بیرینجی شخص تک), بیز ( بیرینجی شخص جمع), سن ( ایکینجی شخص تک), سیز ( ایکینجی شخص جمع), او (اوٌچونجو شخص تک), اوْنلار-اوْلار (اوٌچونجو شخص جمع)
بو ضمیرلر ایسیم کیمی حاللانار. بو حاللانمانی آشاغيدا گؤرمك اوْلار:
آدليق حال: من, سن, اوْ, بيز, سيز, اوْنلار.
يييه ليك حال: منيم, سنين, اوْنون, بيزيم, سيزين, اوْنلارين.
يؤنلوك حال: منه, سنه, اوْنا, بيزه, سيزه, اوْنلارا.
تأثيرليك حال: منى, سنى, اونو, بيزى, سيزى, اوْنلارى.
يئرليك حال: منده, سنده, اوْندا, بيزده, سيزده, اوْنلاردا.
چيخيشليق حال: مندن, سندن, اوْندان, بيزدن, سيزدن, اوْنلاردان.
بو تایلیقلارين بيرينجى و ايكينجى شخص جمع لرى (بيزيم- دن باشقا) جمع علامتى ده آلا بيلر: بيزلرده, بيزلردن, سيزلره, سيزلردن, ...
 
╭•••••••••••••••••••••• ••••••••••╮
╰➤@chgrmn
                                                 #تورکجه_دانیش_ائلنن_باریش                                                                                    
                                                  #تورکجه_یازاق_ائلنن_قالاق                                                                             
                                                  #کیملیییمیزه_بیرگه_دالاق
╰••••••••••••••••••••••••••••••••╯