🍎🏃📚✏️
54-جو درس
ساى (4)
سيرا سايلارى:
سيرا سايلارى شئيلرين سيراسينى بيلديرير. بو سايلار ميقدار سايلارينا دؤرد دچئشيدلى (ينجى (inci), يٌنجى (ıncı), ونجو (uncu), وٌنجو (üncü)) اکلرينى آرتيرماقلا دوٌزه لر. بو سايلار "نئچه نجى" سوالينا جاواب وئرر: اوٌچ --> اوٌچونجو, اوْن --> اوْنونجو, ...
"ایکی, آلتى, يئددى" سايلارى سسلى ايله بيتديكلرى اوٌچون, سيرا سايلارى شكيلچيلرى قوْشولاندا, ايكى "ى" سسليسيندن بيرى دوٌشر: ايكبنجى, آلتينجى, يئددينجى.
ميقدار سايلارى شئيلرين ميقدارينى بيلديرديكلرى حالدا, سيرا سايلارى شئيلرين سيراسينى بيلديرر.
سيرا سايلارينين ايكينجى خصوصيتى اوْنلارین صيفتلره ياخين اوْلماسيدير. صيفتلر كيمى بو سايلادا, عين زاماندا "هانسى؟" سوالينا جواب وئرر.
ميقدار سایلارينين ايسمى جمع اوْلا بيلمزدى, آنجاق سيرا سايلارينين ايسيملرى بعضى حاللاردا جمع علامتى آلا بيلر: اوٌچونجو شاگيردلر, بيرينجى قهرمانلار, ...
سيرا سايلارى موستقيل ايشلنديكده, ميقدار سايلارينا نيسبت, ايسيملره داها ياخين اوْلور. بو حالدا سيرا سايلارى تاماميله موٌستقيل اشيانى نظرده جانلانديرير و ايسيملر كيمى حاللانير و جَمعله نير: اوٌچونجونو گؤردوم, اوْنونجودان سوْروشدوم, سككيزينجىلرى چاغيرديلار, ايكينجىيه سؤزوم واردير, بئشينجىده ثروت واردير, ...
سيرا سايلارى ايسيم مقامينده ايشلننده, ايسيملر كيمى "كيم؟" سوالينا جاواب وئره بيلير: اوٌچونجولر گلدى. كيملر گلدى؟
55-جى درس
ساى (5)
كسر سايلارى:
بو سايلار ميقدار سايلاريندان يارانير. بو سايلار بوٌتؤو بير عددين معين ميقدارينى بيلديرير و ميقدار سايلارى سوالينا جاواب وئرير.
بو سايلار ايستر كسر اعشار (7.3), ايستر ايسه كسر متعارفى (3/5 4) ده آشاغيداكى شكيلده تلفوظ اوْلونار:
واحيدين بؤلوندويو عدد اول دئييلير و اوْندان سوْنرا "دان-دن" و يا "دا-ده" اکلرى گلر و اوْندان سوْنرا كيچيك عدد دئييلير. اؤرنك اوْلاراق يوخاريداكى كسر اعشار بئله دئييلير: يئددى تام و اوْندا اوٌچ. كسر متعارفى ايسه بئله دئييلير: دؤرد تام و بئشدن اوٌچ.
دئييلمه ليدير كى "دان-دن" شكيلچيسى داها دوْغرودور.
قایناق : سس ، صرف کیتابی پروفسور زهتابی-تخلیص ائدن ، سارای خانیم
╭•••••••••••••••••••••• ••••••••••╮
╰➤@chgrmn
#تورکجه_دانیش_ائلنن_باریش
#تورکجه_یازاق_ائلنن_قالاق
#کیملیییمیزه_بیرگه_دالاق
╰••••••••••••••••••••••••••••••••╯
Post #5157
41
- ❤ 1