🍎🏃📚✏️
52-جى درس
ساى (2)
"بير" سايى:
دیلیمیزده "بیر" ساییندان یئنی سؤزلر یاراتماقدا گئنیش ایستیفاده اوْلونور. بير كلمه سى بير نئچه موختليف معناسى اوْلماقلا برابر, موختليف شكيلچيلرله ده موختليف معنالى سؤزلر يارادير. بير كلمه سينين ايشلنديگى يئرلر اوْلدوقجا چوخدور, اوْنلارين لاپ اؤنمليلرى بونلاردير:
1. ايلك ميقدار ساييدير.
2.غيرمعين ليك, نكره و عموميليك بيلديرير: سيز بير ايش گؤرمه ليسيز ...
3. ادات اوْلور و جومله نين اساس فيكرينى گوٌجلندیریر: سن دانيشما بير ...
4. صيفتله ايسيم آراسيندا تعيين ليك وظيفه سى داشييير: عاغيللى بير گنج ...
5. زامان آنلاملى ايسيملرين اوّلينده (آن, دقيقه, ساعات, ون, واخت, زامان, دفعه, ...) ايشلنديكده زامان ظرفى يارادير: بير گوٌن, بير ثانيه, بير ايل, ...
6. آز, چوْخ, قدر, بئله, ائله, نئچه, ... كيمى سؤزدن قاباق گلديكده غير معين ليك مضمونونو آرتيرير و يا اسكيلدير: بير چوْخ, بير قدر, بير آز, بير بئله, ...
7. تَهَر, ساياق, جور, نوع, ... كيمى سؤزلرين باشيندا ايشلنديكده حرکت طرزی ظرفى يارادير: بير تهر جانيمى قورتارديم, بير جور اؤزومه يئر ائله ديم, ...
8. عالم, اتک, ییغین, سوٌرو, بؤلوك, اوْووج, ... كيمى سؤزلردن اؤنجه ايشلنديكده غيرمعين كميت بيلديرير: بير عالم ايش گؤردولر, بير اتك مئيوه ييغديم, ...
9. طرف, يان, جهت, ... كيمى سؤزلرين باشيندا گلركن, بؤلو مضمونو يارادار: بير يان, بير ياندان, بير طرفدن, ...
10. "يم 4" شكيلچيلى فعلى صيفتلردن قاباق گلر و ميقدار بيلديرر: بير ايچيم سو, ...
53-جو درس
ساى (3)
"بير" سايى:
11. "جه" شكيلچيسى واسيطه سيله تام واحيدليك ايفاده ائدير: بيرجه ساعات, بيرجه آدام, بيرجه دقيقه, ...
12. "دن" شكيلچيسى قوْشولدوقدا بو ساى حركت طرزى ظرفى يارادير: بيردن گلدى.
13. ايكى دفعه تكرار اوْلان بو سايين بيرينجيسينين سوْنوندا "دان" و ايكينجيسينين سوْنوندا "ه" اوْلدوقدا حركت طرزى ظرفى يارادير: بيردن- بيره پرده آچیلدی, ....
14. "گه" شکیلچیسی ایله معیت بیلدیریر: بیرگه گئتديک, ....
15. "لیک" اکی ایله ایسیم یارادیر: بیرلیک. بو كلمه یه "ده" شکیلچیسی آرتیردیقدا, يئنه ده معيت بيلديرير: بيرليكده گئتديك, ...
16. هردن, تك, آرا, ساعاتدا, گوٌنده, آيدا, ايلده, كيمى زامان مضمونلو سؤزلردن سوْنرا ايشلنديكده تصادوف و تكرار مضمونو ايفاده ائدير: آرا بير گلير, هردن بير گؤرونور, آيدا بير يوْلدور, ...
17. نيسبت شكيلچيسى ايله غيرمعين عوضليك (ضمير) يارانير: بيرى قورويا چكير, بيرى سولويا. بيريسى سنى چاغيرير, ...
18. اوٌچونجو نوع تعيينى سؤز بيرلشمه سينين ايكينجى طرفينده حال, وضعيت, كئيفيت و باجاريق مقياسى اوْلار: اوشاغين بيرى, دلينين بيريدير, اوْد- آلووون بيريدير, ...
19. موختليف سؤزلرله تركيب ياراديب جور به جور مضمونلار ايفاده ائدير: بير ده وور, بير داها سؤيله, بيرينجىيَم, بير باش قليان چك, سؤز بير, بير پارا, بير سؤزله, ...
بونلار ديليميزده "بير" سؤزونون ایستیفاده سیندن يالنيز نئچه نمونه دير.
قایناق : سس ، صرف کیتابی پروفسور زهتابی-تخلیص ائدن ، سارای خانیم
╭•••••••••••••••••••••• ••••••••••╮
╰➤@chgrmn
#تورکجه_دانیش_ائلنن_باریش
#تورکجه_یازاق_ائلنن_قالاق
#کیملیییمیزه_بیرگه_دالاق
╰••••••••••••••••••••••••••••••••╯
Post #5151
31
- ❤ 1