Joriy yilning 1-oktabridan 1-noyabriga qadar yurtimiz bo‘ylab "Yoshlar orasida giyohvandlik vositalari va psixotrop moddalar tarqalishining oldini olish va unga qarshi kurashish" keng qamrovli tezkor-profilaktik oyligining uchinchi bosqichi o‘tkazilmoqda. Ushbu oylik doirasida Jondor tumani IIB Jamoat xavfsizligi xizmati Huquqbuzarliklar profilaktikasi bo‘limining voyaga yetmaganlar masalalari bo‘yicha inspektor-psixologlari tomonidan tizimli tadbirlar amalga oshirilmoqda.

Targ‘ibot va profilaktika uchrashuvlari tumandagi umumta’lim maktablari, texnikumlar, o‘quv kurslari hamda yoshlar ko‘p to‘planadigan jamoat joylarida tashkil etilmoqda. Tadbirlar davomida o‘quvchi yoshlarga giyohvandlik vositalari hamda psixotrop moddalarning inson salomatligiga ko‘rsatadigan salbiy oqibatlari va ularning kelajakka tug‘diradigan xavfi haqida batafsil tushuntirish ishlari olib borilmoqda.

Shuningdek, mutasaddilar tomonidan yoshlarni turli salbiy ta’sirlardan asrash, ularning bo‘sh vaqtlarini mazmunli tashkil etish va sog‘lom turmush tarzini keng targ‘ib qilish masalalariga alohida e’tibor qaratilmoqda. Qolaversa, o‘g‘il-qizlarning huquqiy hamda psixologik savodxonligini oshirish yuzasidan zaruriy tavsiyalar berib borilmoqda.