Buxoro viloyatidagi voyaga yetmaganlarga ijtimoiy-huquqiy yordam ko'rsatish markazida tarbiyalanayotgan voyaga yetmaganlarning bo‘sh vaqtini mazmunli tashkil etish, ularning qiziqish va iste’dodlarini aniqlash hamda milliy qadriyatlarimizga hurmat ruhida tarbiyalash maqsadida Chavandozlar maktabiga maxsus tashrif tashkil etildi.

Tashrif davomida yoshlarga milliy ot sporti, qadimiy chavandozlik an’analari va ushbu yo‘nalishda olib borilayotgan mashg‘ulotlar haqida batafsil ma’lumot berildi. Ular chavandozlarning otlarni parvarish qilish sirlari, ot minish va boshqarish ko‘nikmalari, shuningdek, ot sportining o‘ziga xos jihatlari bilan yaqindan tanishdilar.

Mazkur tadbir davomida voyaga yetmaganlarda milliy merosimiz va an’analarimizga bo‘lgan qiziqishni yanada oshirish, bo‘sh vaqtlarini foydali mashg‘ulotlar bilan o‘tkazish, ularda jismoniy faollik va sog‘lom turmush tarziga intilishni shakllantirishga alohida e’tibor qaratildi.