🔵
Sayyohlar gavjum, Buxoro yana o‘zining betakror jozibasini namoyon etmoqda
Qadimiy Buxoro yana xorijiy va mahalliy sayyohlarni o‘ziga chorlamoqda. Kuz faslining iliq va moʻtadil kunlarida shaharning tarixiy ko‘chalari, qadimiy obidalari va sayyohlik maskanlarida gavjumlik yaqqol sezilmoqda.
Ayni kunlarda BuxorogaAQSH, Rossiya, Qozog‘iston, Qirg‘iziston, Tojikiston, Turkmaniston, Italiya, Ispaniya, Fransiya, Turkiya, Xitoy, Indoneziya va Malayziya kabi mamlakatlardan xorijiy sayyohlar kelmoqda. Ular ko‘hna shaharning asrlar davomida shakllangan boy tarixi, noyob me’moriy qiyofasi, milliy qadriyatlari va madaniy merosi bilan yaqindan tanishmoqda.
Sayyohlar uchun Buxoroning har bir ko‘chasi va har bir me’moriy yodgorligi alohida qiziqish uyg‘otmoqda. Xususan, Poyi Kalon majmuasi, Ark qal’asi, Labi Hovuz majmuasi, “Yetti pir” ziyoratgohlari, qadimiy hunarmandchilik markazlari hamda yangi tashkil etilgan turistik lokatsiyalar mehmonlarning eng ko‘p tashrif buyurayotgan manzillari sirasiga kiradi.
Buxoroga kelayotgan sayyohlar nafaqat tarixiy obidalarni tomosha qilmoqda, balki mahalliy aholining turmush tarzi, milliy urf-odatlari va an’analari bilan ham yaqindan tanishmoqda. Ayniqsa, kulolchilik, zargarlik, kashtachilik, misgarlik, gilamdo‘zlik kabi an’anaviy hunarmandchilik turlari xorijlik mehmonlarda katta qiziqish uyg‘otmoqda.
Milliy gastronomiya ham Buxoroga tashrif buyurayotgan sayyohlar uchun o‘ziga xos taassurot manbai bo‘lmoqda. Mehmonlar palov, somsa, sho‘rva va boshqa milliy taomlardan tatib ko‘rish barobarida, ularni tayyorlash jarayoni bilan ham tanishish imkoniyatiga ega bo‘lmoqda.
Kuzning yoqimli va moʻtadil ob-havosi esa sayyohlarga shahar bo‘ylab bemalol sayr qilish, tarixiy obidalarni tomosha qilish, qadimiy ko‘chalar muhitini his etish va Buxoroning o‘ziga xos jozibasidan bahramand bo‘lish uchun yanada qulay sharoit yaratmoqda.
Bugungi kunda Buxoro nafaqat O‘zbekistonning, balki Markaziy Osiyoning eng qiziqarli turistik manzillaridan biri sifatida xorijiy mehmonlar e’tiborini jalb etmoqda. Qadimiy shaharning boy tarixi, betakror me’morchiligi, milliy madaniyati va mehmondo‘st xalqi sayyohlarga unutilmas taassurot bag‘ishlamoqda.
Buxoro.uz |
Facebook |
Instagram |
YouTube
