🇦🇱 Албанияда ҳукуматга қарши намойишлар оммавий тартибсизликларга айланди

Албанияда ҳукуматга қарши талабалар намойишлари пойтахт Тиранадан бошқа шаҳарларга ҳам тарқалди. Намойишчилар бош вазир Эди Раманинг истеъфога чиқишини талаб қилмоқда.

Бир неча кунлардан бери пойтахт Тирана шаҳрида намойишчилар ва полиция ўртасида тўқнашувлар юз бермоқда. Норозилик акциялари мамлакатнинг Шкодер ҳамда жанубдаги қирғоқбўйи шаҳарларида ҳам ўтказилмоқда.

Намойишчилар таълим вазирлиги ва бош вазир девони томон юриш қилди. Тўқнашувлар чоғида уларнинг айримлари ахлат қутилари, автобус бекатлари ва киоскка ўт қўйди. Айримлари эса йўлакдан кўчириб олинган бетон блоклар билан ҳукуматга алоқадор биноларнинг ойналарини синдирди.

Намойишчилар банкларга ҳам тош отди, банкоматларни бузди ва бир банкка бостириб кирди. Баъзилари шаҳардаги янги баланд биноларни ҳам нишонга олди. Уларнинг айтишича, ҳукумат хорижлик меъморлар лойиҳалаган бинолар ортида мактаб ва университетларга эътиборсизлигини яширмоқда.

Полиция тош отаётган намойишчиларга қарши товушли гранаталардан ҳам фойдаланди. Пойтахт марказидаги Скандербег майдонида полиция қочаётган намойишчиларни дубинкалар билан урди. Яқин атрофда зўравонлик яна авж олгани сабаб парламент ўша куни мажлисини бекор қилди.

Полиция 55 киши ҳибсга олинганини, яна 98 кишига жиноий айблов қўйилганини маълум қилди. Соғлиқни сақлаш вазирлиги маълумотига кўра, 89 киши жароҳатланган, улар орасида 61 нафар полициячи ва 18 нафар намойишчи бор.

Намойишчилар Албания бош вазири Эди Рама истеъфога чиқишини талаб қилмоқда. Улар ҳукуматдан таълим шароитларини яхшилаш, талабалар дуч келаётган муаммоларни ҳал этиш ва мамлакатда реал ўзгаришлар қилишни сўрамоқда. Талабалар, айниқса, ўқиш тўловларининг юқорилиги ва университетлардаги шароитлардан норози.

Албанияда ҳукуматга қарши намойишлар май ойи охиридан бери давом этмоқда. Норозиликларга қирғоқбўйидаги муҳофаза этиладиган табиий ҳудудда ҳашаматли меҳмонхона қуриш режалари ҳам сабаб бўлган. Лойиҳа АҚШ президенти Доналд Трампнинг қизи Иванка Трамп ва унинг турмуш ўртоғи Жаред Кушнер билан боғлиқ. Бу режалар ҳукуматдаги эҳтимолий коррупсия ва қарорлар қабул қилиш жараёнининг шаффоф эмаслиги юзасидан танқидларга сабаб бўлган.

🔥 @burchakostida