🇺🇦🇷🇺 Россия армияси сентябр ойида Украинадаги жангларда 50 мингдан ортиқ ҳарбий хизматчисини йўқотди, улардан 28 минг нафари ҳалок бўлган

Бу ҳақда NATO'нинг юқори мартабали ҳарбий вакилига таяниб, Bloomberg хабар берди.

NATO вакилининг айтишича, ҳужумларни давом эттираётган Россиянинг бир ойлик ҳарбий йўқотишлари рекорд даражага етган. Россия қўмондонлиги аскарларни Украина дронлари ва артиллерияси ҳужумларига учраши ёки миналарда портлаб кетиши мумкин бўлган хавфли ҳудудларга юбормоқда.

Асосан мудофаада турган Украина армиясининг сентябр ойидаги йўқотишлари эса ҳалок бўлган ва яраланганларни қўшиб ҳисоблаганда, тахминан 5 минг кишини ташкил этган.

Россия армиясининг йўқотишлари сўнгги ойларда ошиб бормоқда. Апрел ва июн ойларида NATO бош котиби Марк Рютте Россия айрим ойларда 30–35 минг нафар аскарини йўқотаётганини айтганди. Бу рақамга ҳалок бўлганлар ва яраланганлар киради.

Бироқ август охирида NATO бош котиби ўринбосари Радмила Шекеринска Россиянинг ойлик йўқотишлари 40 минг кишидан ошганини маълум қилган. Сентябр ойида эса Рютте бу кўрсаткич 43 минг нафарга етганини айтган.

Аввалроқ Стратегик ва халқаро тадқиқотлар маркази (CSIS) ҳисоб-китобларида Россия 2022 йил февралидан 2026 йил июнигача қарийб 1,4 миллион ҳарбий хизматчисини йўқотгани айтилганди. Улардан камида 450 минг нафари ҳалок бўлган.

🔥 @burchakostida