Куһаҕаны ахтыы туһунанАатырбыт бэйиэт, Литэрэтиирэҕэ Нобель бириэмийэтин лауреата Иосиф Бродскай Мичиган университетын бүтэрээччилэргэ тыл эппиттээх. Ол тылыгар бэйэҕитин хаһан да сиэртибэ быһыытынан санаммат буолуҥ диэн сүбэлээбитэ.
Ким эрэ эһиэхэ куһаҕаны оҥорор буоллаҕына, дьалты хааман биэриҥ, ол сатаммат буоллаҕына, ааххайбакка буола сатааҥ, тулуйуҥ, диэбитэ.
Салгыы, атаҕастаабыт дьоҥҥутун бырастыы гыныҥ уонна кинилэри букатын умнан кэбиһиҥ, диир.
Атаҕастаабыттарын туһунан хаһан да кимиэхэ да, ол иһигэр эһиги диэки буолар дьоҥҥо, кэпсээбэт буолуҥ. Бырастыы гыммыккыт туһунан эмиэ кэпсээбэт, хаһан да ахтыбат буолуҥ. Тоҕо диэтэххэ, ахтыы кинилэр куһаҕан дьайыыларын уһатан биэрэр. Маны аанньаллар сөбүлүөхтэрэ биллибэт, ол эрээри абааһылары уодьуганныырга, умнуу – саамай күүстээх дьайыы, диир Бродскай.
Хайдаҕый?! Сөбүлэһэҕит дуо?
Санаттахха, Бродскай 19 сааһыгар геологическай партияҕа коллекторынан (хомуйааччы оробуочайынан) үлэлии Саха сиригэр бастакытын кэлэ сылдьыбыттаах. Чульмаҥҥа билиҥҥи Нерюнгри чоҕун баайын чинчийэр эспэдииссийэҕэ ("Чульман, Чульман деревянный" диэн бэчээттэммэтэх хоһооннооҕун архыыптан булбуттара). Икки сыл буолан баран аны Анаабырга сылдьыбыта, эмиэ геологтар партияларыгар үлэлии. Ол эрээри биһиэхэ бастакы сырыыта улахан суолталаах. Онно, бастакы сырыытыгар, сөмүлүөт көппөккө, Дьокуускайга хааттара сытан, кинигэ лааппытыттан Баратынскай томигын атыыласпыта, уонна, бэйэтэ ахтарынан, онтон саҕалаан уонна сылтаан олоҕун хоһоонҥо аныырга санаммыта. Дьокуускай пуордугар бу түгэҥҥэ сыһыаннаах өйдөбүнньүк сурук ыйаабыттара дииллэр, норуодунай суруйааччы Наталья Харлампьева көҕүлээһининэн. Көрдөххүтүнэ, хаартыскаҕа түһэрэн ыытаарыҥ.