✝️4 кастрычніка 1744 года ў 🏰 Камянцы (сёння Брэсцкая вобласць) нарадзіўся каталіцкі дыяцэзіяльны біскуп, багаслоў-асветнік і удзельнік паўстання Касцюшкі Міхал Францішак Карповіч.

У 1757–1761 гадах навучаўся ў Брэсцкім езуіцкім калегіуме, а ў 1761 годзе ўступіў у ордэн місіянераў. Да 1766 года служыў клірыкам у касцёле Святога Крыжа ў Варшаве, пасля чаго пачаў выкладаць філасофію і тэалогію ў семінарыях Варшавы, Кракава і Вільні. У 1774 годзе пакінуў ордэн і, дзякуючы падтрымцы біскупа Ігнацы Масальскага, стаў пробашчам у Гражышках на Сувальшчыне.

Міхал Францішак Карповіч атрымаў вядомасць сваімі казаннямі, у якіх крытыкаваў прыгон і жорсткае абыходжанне з сялянамі, прапаноўваў перавод на чынш і ўвядзенне парафіяльных школ. Яго ідэі падтрымалі рэфарматары і кароль Станіслаў Аўгуст Панятоўскі. У 1776 годзе быў прызначаны архідыяканам смаленскім, пазней стаў канонікам пазнанскім і атрымаў медаль «Заслужаным».

З 1783 года выкладаў дагматычную тэалогію ў Галоўнай школе ВКЛ у Вільні і падтрымліваў Канстытуцыю 3 мая 1791 года. Падчас паўстання 1794 года ўвайшоў у паўстанцкі ўрад і пасля яго падаўлення быў звольнены з прафесарскай пасады. У 1797 годзе стаў біскупам віграўскім, заснаваў духоўную семінарыю ў Віграх на Падляшшы і сабраў багатую бібліятэку ў Гражышках.

Памёр 5 лістапада 1803 года.