🖊 Сёння магло б споўніцца 90 год літаратуразнаўцу, філолагу, дэкану Брэсцкага ўніверсітэта і ўраджэнцу Брэстчыны — Аляксею Майсейчыку.

Нарадзіўся 4 кастрычніка 1936 года ў вёсцы Гошчава (цяпер 🌿 Івацэвіцкі раён Брэсцкай вобласці). Дзяцінства прыпала на гады Другой сусветнай вайны. Пасля заканчэння школы ў 1955 годзе паступіў на філалагічны факультэт 🎓 Брэсцкага педагагічнага інстытута.

Пасля атрымання дыплома два гады працаваў настаўнікам беларускай мовы і літаратуры ў роднай школе. У 1962 годзе стаў аспірантам Інстытута літаратуры імя Янкі Купалы АН БССР. З 1966 года яго жыццё было цесна звязана з Брэсцкім педагагічным інстытутам, дзе ён прайшоў шлях ад выкладчыка да прафесара, быў дэканам філалагічнага факультэта і загадчыкам кафедры беларусазнаўства.

Аўтар шэрагу навуковых і вучэбных прац па гісторыі і тэорыі беларускай літаратуры, методыцы яе выкладання, а таксама кніг пра пісьменнікаў Брэстчыны. Даследаваў творчасць Піліпа Пестрака, Алеся Разанава, Яўгеніі Янішчыц, Ніны Мацяш і іншых беларускіх аўтараў.

Памёр 12 траўня 2002 года. Пахаваны на гарадскіх могілках «Плоска» ў 🏹 Брэсце.