☝️У Польшчы за кантрабанду цыгарэтаў і абыход санкцыяў затрымалі двух беларусаў

Шасцёра чалавек былі затрыманыя паводле падазрэння ў кантрабандзе цыгарэтаў з Беларусі з дапамогаю метэазондаў. Пра гэта паведаміла Падляскае аддзяленне Памежнай аховы Польшчы.

Сярод затрыманых – двое беларусаў. Адзін з іх трапіў пад увагу памежнікаў у гміне Кнышын, калі перавозіў на аўтамабілі 11 тысячаў пачкаў цыгарэтаў без польскіх знакаў агульным коштам 227 тысячаў злотых (больш за 58 тысячаў долараў).Было вызначана, што цыгарэты трапілі ў Польшчу з дапамогаю паветраных шароў. Яшчэ аднаго беларуса затрымалі ў гміне Завады, а разам з ім – чацвярых грамадзянаў Латвіі. У багажніку іхнага аўтамабіля знайшлі больш за 14 тысячаў пачкаў цыгарэтаў, перакінутых праз мяжу метэазондамі, коштам каля 290 тысячаў злотых (больш за 74 тысячы долараў).

Усе затрыманыя ўзятыя пад варту на тры месяцы. Ім выстаўленыя абвінавачанні ў падатковых злачынствах і абыходзе санкцыяў. Мужчынам пагражае пазбаўленне волі тэрмінам ад трох гадаў. ☝️