Көҙ еттеме, ҡапыл шау-шыу итеп,
Телгә килә һүҙсән ағастар.
Олондарҙың япраҡ булып осҡан
Хәбәрендә бөтмәҫ һағыш бар.
Уларҙың һәр һүҙе һайын моң-зар,
Һәр бер өнө - яҙҙы һағыныу.
Ишетелеп ҡала: "Һүнер булғас,
Ниңә кәрәк күкрәп ҡабыныу?.."
Тик уларҙы ишетмәмеш булып,
Ярһыбыраҡ иҫә көҙгө ел.
Был аяуһыҙ дәһшәт хозурында
Тәлгәштәрҙең түккән һүҙе йәл.
Ағастар ҙа бер саҡ тынып ҡалыр,
Һуңғы япраҡ төшкәс өҙөлөп.
Улар тыныр, асҡан эс серҙәрен
Кемдер аңлауынан төңөлөп.

М. Ямалетдинов 🍂