ڕچەماڕە
کتێبوو ڕچەماڕێ یۆتەر جە نویسیە و هەرمانە یاگەڐارەکاو مامۆسائێبراهیم شەمسی کە پیسەو هەدیەیە گەورەی کیاسەبێش پەیم ئی دووە شەوە بەتەمامی وەناموە.
یاگێ دەسوەشی و مانی نەویەی چنڐە جارەیش هەن جە مامۆسا شەمسی کە ژیوانامەو وداستانەو ژیوای وسەخڵەتیەکاو ژەنەیش نویسیەن ، هەم جە سەخڵەتی ژیواینە ، ئازارێ فرێش دیێنێ وهەمیچ بە ڕۆحەی گەورەی کە بیەنش ڕچەیەش ماڕان کە ژەنی جە وێش،جە هازیش وجە هۆنەریش قسێ دڵوو وێش کەرۆ وبۆ بە ڕچەماڕەو هورامانی.
دەس وەش مامۆساشەمس کە جیا جە کارو دادا ناهیدێ کە ڕچەماڕیش کەردەن، نویسیەکاو جەنابیچت جە گردوو کتێوەکاتەنە وبەتایبەت ئی کتێوە وێش ڕچە ماڕیەتەرەن کەخەڵکو ئێمە وبەتایبەت ژەنی باوڕ بە وێشا بۆ و هاز وتوانوو وێشا نیشانە دا و جە گەورەیی،ئێخلاق وهۆنەرەنە نموونێ با.
نویسەرو ڕچەماڕێ بە زوان وڕۆحەی هورامیانە وپیسەو کارگەردانەی وردبین گردو بەشەکاو ژیوای دادا ناهیدێ ویانەوایش وستێنێ وەروو چەمان وئەنڐە جوان وبە دڵ نزیکەن و واقعیەتوو ژیوای ئی هۆنەرمەندێشە شیوە کەردەن ، ئێنسانی چەنی وێش بەرۆ وعاشقو پیرەکاو تەوێڵێ بۆ وچا سەردەمە سەخڵەتەنە چا بیابانە جە ڕۆمادیە ساڵهایە فرێ ئاوارێ با.سەختی ژیوای بەتایبەت ژیوای ژەنا و ویرو پیاسالاری و گورانی واتەی و پاڵپەشتی یانەوایش.
قەڵەموو مامۆسا ئێبڕاهیمی فرە خەمینانە باسو گێڵای ئەڐا وتاتەو ناهیدێ پەی ئێرانی ودماتەر مەرگوو بابەیش جە هەولێروئەڐایش جە وانوو تورکیەی و نیشاندای نەقشو خەمەوەری وئۆقرەیی داداناهیدێ ودماتەر لوای پەی ئورووپای و وینەی ئازادیەی ڕوشنتەر ودووری جە خەمە قووڵەکاو ئاڵتاشی.
نویسەرجوان تاوانش ئینانە پیسەو دووربینی فیلمشا گێرۆ ونمایششا دۆ.
نویسەر هەرچەن خەریکەن باسو ژیوای ئی هونەمەندێ کەروو بەڵام هاموەخت باوەتێ کۆمەڵایەتیێ، شێوە و ژیوای ژەنا، یاگێ هونەری وهونەرمەندی وکاریگەری پیاسالاری وزۆ وەرووچەمان.
ماموسا ئێبراهیم چی نویسیەینە ماچۆ هورامان هەریاگێ هونەری بیێنە و چەندین ژەنێ بیێنێ گورانیێشا واتێنێ بەڵام بێ نام ونیشان مەنێنێوە و بڕەی هوکارێ کاریگەرێ بیێنێ کەدەنگ و ڕەنگوو ژەنا دیار نەگنو تا ئینەکێ دادا ناهیدە هورامیە ئەوەڵ جار جە تلویزیون 2001 گورانیێش واتێ و گورانیەکێچش جە بارەو پیای بێ و پی جۆرە گۆمە مەنگەکێ شڵەقیا وڕچە ماڕیا وتازەگەری ئامەوەروە و ئا پیسە ئارۆ جە هونەر، پزیشکی ،ماموستایی و...سەدها ژەنێ نامدارێماهەنێ.
وانەر جە وەنەی ئی کتێویە ویری قووڵ کەرۆوە کە ئی یانەوایە پی گردە ئازاروو دەربەدریە کەتاومێ پیسەو فیلمیە تراژیک نامێش بەرمێ چەنی ئی کناچە گەورێشانە پەروەردە کەردێنێ وئا پیسە سەرو دەرد وڕەنجەکا بازی بەرا وکەراشا پردی پەی گەورەیی پەی عەداڵەتی ئێنسانی پەی باوڕکەردەی بەوێ وپەی ڕچەماڕدای.
ڕچەماڕە ڕایەش واز کەردێنە پەی کناچەکاو هورامانی کە سەختی شکستشا پەنە نەڐۆ وباوڕشا بەوێشا فرەتەروە بۆ.ئەڵبەت چی مەسیرەنە ڕەنگ ودەنگ وگەورەیی وپاڵپەشتی کاکە ڕۆزگاری فەتاحی هامسەروو ناهیدە خانمێ، پیسەو کۆڵەکەیە قاییمێ دیار وکاریگەرەن کە بەباشی نویسەر شیوشەوە کەردەن.
ئافەرین مامۆسا ئێبراهیم شەمس پەی بەرزی قەڵەمیت و ئەشناسنای فرەتەروو ئی هونەرمەندێ بە خەڵکی کە چی مەسیرەنە چنڐە سەخڵەتیێ و ئازارێش دیێنێ و باوڕش بە وێش پێیا کەردەن وئارۆ بیێنە ڕچەماڕەو هورامانی.
....کاکایی
@shanshin11
