Surxondaryo viloyati hokimligi

Oltinsoyda uzumchilik va milliy taomlar festivali boshlandi

Oltinsoy tumanida "O‘zbekiston enoturizmi va milliy taomlar festivali"ning tantanali ochilish marosimi bo‘lib o‘tdi. Festivalda Surxondaryoning uzumchilik an’analari, milliy taomlari, mahalliy mahsulotlari va sayyohlik salohiyati keng namoyish etilmoqda.

Tadbirda Surxondaryo viloyati hokimi Ulug‘bek Qosimov ishtirok etdi. Dastlab viloyat rahbari mehmonlar va mutasaddilar bilan birgalikda shahar va tumanlar pavilonlari, milliy taomlar, meva-sabzavotlar, uzumchilik hamda vinochilik mahsulotlari ko‘rgazmalari bilan tanishdi.

Ko‘rgazmalarda hududlarning o‘ziga xos mahsulotlari, milliy qadriyatlari, hunarmandchilik namunalari va an’analari namoyish etildi. Ayniqsa, Oltinsoyning serhosil uzumzorlari, uzum navlarining xilma-xilligi va mahalliy mahsulotlar festivalning asosiy e’tibor markazida bo‘ldi.

Festivalning ochilish marosimida so‘zga chiqqan viloyat hokimi bunday tadbirlar milliy qadriyatlarimizni targ‘ib qilish, mahalliy mahsulotlarni keng ommalashtirish, tadbirkorlar uchun yangi imkoniyatlar yaratish va hududning sayyohlik jozibadorligini oshirishda muhim ahamiyat kasb etishini ta’kidladi.

Festivalda viloyatning 15 ta hududi o‘zlariga xos milliy taomlar, meva-sabzavotlar, uzum navlari va hunarmandchilik mahsulotlarini namoyish etmoqda. Oliy ta’lim muassasalari tomonidan tashkil etilgan "Dunyo taomlari va xalqlari" ko‘rgazmasi, milliy sport o‘yinlari, folklor-etnografik jamoalar chiqishlari hamda brend restoranlar taqdimotlari tadbirga yanada fayz bag‘ishladi.

Tantanali ochilish marosimi konsert dasturi bilan davom etdi. Poytaxtdan tashrif buyurgan san’atkorlar, vohaning taniqli xonandalari, ansambllar va folklor jamoalari chiqishlari ishtirokchilarga ko‘tarinki kayfiyat ulashdi.

Festival tadbirlari va ko‘rgazmalari ertaga ham davom etadi. Galakonsertda turli nominatsiyalar bo‘yicha g‘oliblar taqdirlanadi.

Barcha yurtdoshlarimizni festival tadbirlarida ishtirok etishga taklif etamiz!

Surxondaryo.uz | Telegram | Facebook | Instagram | YouTube | X

Surxondaryoda "Surxon-Agro" zonasi uchun yangi imtiyozlar: yer — narxning 1–10 foiziga, soliqlar — 5 yilga nol

Prezidentning 2026-yil 13-oktabrdagi PF–224-son Farmoni bilan Sherobod tumanidagi "Surxon-Agro" erkin iqtisodiy zonasida issiqxona va agrologistika loyihalarini jadallashtirish choralari belgilandi.

📌 Yer ajratish
• Yer elektron onlayn auksion orqali beriladi. Boshlang‘ich narx — normativ qiymatning 10 foizi.
• Qiymati kamida 10 mln dollar bo‘lgan loyihalar hamda Toshkent shahri va viloyatidan issiqxonasini ko‘chiruvchilar uchun boshlang‘ich narx — atigi 1 foiz.
• Xorijliklar va chet el kapitalli korxonalarga yer ajratishdagi cheklovlar bu zonada amal qilmaydi.
• Har bir investor bilan investitsiya bitimi tuziladi. Majburiyat bajarilmasa, yerga bo‘lgan huquq sud orqali bekor qilinadi.

💰 Imtiyozlar (5 yilga)
• Yer solig‘i, mol-mulk solig‘i va foyda solig‘idan ozod.
• O‘zbekistonda ishlab chiqarilmaydigan uskuna va materiallar uchun bojxona boji to‘lanmaydi.

🏗 Moliyalashtirish
• Infratuzilma (gaz, elektr, suv, oqova, 50 km yo‘l, kollektor) uchun — 220 mlrd so‘m.
• Issiqxona majmualari uchun — 180 mlrd so‘m, agrologistika markazi uchun — 20 mlrd so‘m.
• 2027-yilda xalqaro moliya institutlaridan 100 mln dollar jalb qilinadi.
• Tayyor issiqxonalar tadbirkorlarga 7-yillik bo‘lib to‘lash yoki lizing asosida sotiladi.

🌱 Qurilish rejasi
"Uzagrostar xolding" tarkibidagi 8 ta kompaniya 8 ta tijorat banki bilan birgalikda har biri 2026-yil 1-dekabrgacha 10 gektar, 2027-yil 1-maygacha 40 gektar issiqxona barpo etadi. 2027-yil 1-iyungacha 20 gektarlik agrologistika markazi quriladi.

🏠 Shuningdek, davlat banklari balanisidagi issiqxonalar 2 oy ichida zonaga ko‘chiriladi, ishchilar uchun esa 7,2 gektar yerda ko‘p kvartirali uylar quriladi.

Tajriba muvaffaqiyatli bo‘lsa, 2028-yilgacha shunday issiqxona klasterlari boshqa hududlarda ham tashkil etilishi mumkin.

Surxondaryo.uz | Telegram | Facebook | Instagram | YouTube | X