⚡️Dini dəyərləri radikal ideyalardan fərqləndirmək vacibdir

Bu barədə Azərbaycanın "Dini Qurumlarla (Mübarizə) İş üzrə Dövlət Komitəsinin sədri Ramin Məmmədov bildirib.

O qeyd edib ki, ölkənin dünyəvi dövlət idarəçiliyi modeli ilə mənəvi dəyərlər arasında heç bir ziddiyyət yoxdur.

Onun sözlərinə görə, gənclər etibarlı mənbələrdən bilik əldə etməli və dini inancları manipulyasiyalardan fərqləndirməyi bacarmalıdırlar.

“Müxtəlif dini və mədəni inanclara malik insanların milli maraqlar, qanun qarşısında bərabərlik və qarşılıqlı hörmət əsasında birgə yaşaması sosial sabitliyin mühüm şərtidir”, — deyə Məmmədov vurğulayıb.

Qeyd: Dini Qurumlarla İş üzrə Dövlət Komitəsi, yoxsa dini dəyərləri şübhə altına alan komitə?

Dini Qurumlarla İş üzrə Dövlət Komitəsinin sədri Ramin Məmmədov bildirir ki, dini dəyərləri radikal ideyalardan fərqləndirmək vacibdir. Əlbəttə, bu fikirlə mübahisə etmək olmaz. Amma əsas sual budur: Dini dəyərlərdən danışan Dövlət Komitəsi həmin dəyərlərin qorunması üçün nə edir?

Əgər hicab İslam dininin hökmlərindən biridirsə, hicablı şagirdlərin təhsil hüququ ətrafında yaranan mübahisələrə niyə ilk növbədə dini etiqad azadlığı və insan hüquqları prizmasından yanaşılmır? Niyə dindar insanların narahatlıqları dinlənilmək əvəzinə, müzakirələrdə radikalizm və manipulyasiya mövzuları ön plana çıxarılır?

Ramin Məmmədov deyir ki, dünyəvi dövlət idarəçiliyi ilə mənəvi dəyərlər arasında ziddiyyət yoxdur. Elə isə bu prinsip praktikada da öz əksini tapmalıdır. Dünyəvilik dinə qarşı mübarizə deyil, dövlətin müxtəlif dini inanclara bərabər münasibət göstərməsi və vətəndaşların vicdan azadlığını qorumasıdır.

Komitə sədri qanun qarşısında bərabərlikdən və qarşılıqlı hörmətdən danışır. Bəs hicablı şagirdlərin və onların valideynlərinin inanclarına hörmət harada qalır? Onların narahatlıqlarını dinləmək və hüquqlarını müdafiə etmək də qarşılıqlı hörmətin tərkib hissəsi deyilmi?

Dini dəyərləri radikal ideyalardan fərqləndirmək lazımdırsa, ilk növbədə dini hökmə əməl etməklə radikalizmin eyni şey olmadığını açıq şəkildə bildirmək lazımdır.

Dini Qurumlarla İş üzrə Dövlət Komitəsinin vəzifəsi yalnız dini məsələlərə nəzarət etmək deyil, həm də dini etiqad azadlığının təmin olunmasına töhfə vermək olmalıdır.

Dini dəyərlərə hörmət gözəl bəyanatlarla deyil, həmin dəyərlərə bağlı insanların hüquqlarına münasibətlə ölçülür.

#Azərbaycan

Abunə olun 🟢 Ar-Rad GA