Андижон қишлоқ хўжалиги ва агротехнологиялар институтида “Барқарор қишлоқ хўжалиги ва озиқ-овқат хавфсизлигини таъминлашда инновацион агротехнологиялар ва чорвачиликнинг глобал интеграцияси” мавзусида халқаро илмий ва илмий-техник анжуман ўтказилди.

Қишлоқ хўжалиги, Олий таълим, фан ва инновациялар вазирликлари ҳамда институт ҳамкорлигида ташкил этилган анжуманда соҳа мутахассислари, аграр йўналишдаги олий таълим муассасалари профессор-ўқитувчилари, хорижий олимлар, тадқиқотчилар ва иқтидорли талабалар иштирок этди.

Анжуман доирасида Ўзбекистон, Латвия, Корея Республикаси, Қирғизистон ва Тожикистондан иштирок этган олим ва мутахассисларнинг илмий маърузалари тингланди. Уларда барқарор қишлоқ хўжалигини ривожлантириш, инновацион агротехнологияларни амалиётга жорий этиш, иқлим ўзгаришлари шароитида аграр соҳани такомиллаштириш, чорвачилик ва ветеринария ҳамда озиқ-овқат хавфсизлигини таъминлаш масалаларига алоҳида эътибор қаратилди.

Шунингдек, анжуман шўъба йиғилишларида селекция ва уруғчилик, экологик хавфсизлик, энергия самарадорлиги, инновацион агротехнологиялар ҳамда чорвачилик соҳасидаги замонавий ёндашувлар юзасидан илмий фикр ва таклифлар муҳокама қилинди.

Халқаро анжуман соҳа олимлари ўртасида тажриба алмашиш, илмий ҳамкорликни кенгайтириш ва аграр тармоқда замонавий ечимларни амалиётга татбиқ этиш учун муҳим мулоқот майдони бўлди.

Andijan.uz|Facebook|Instagram|Youtube|X