پیچیلتی(حیکایه)
یازان:زومرود یاغمور
کوچورن:سحرخیاوی
باکی،۱۸ آپرئل
آرتیق موسیقی دینلَه‌میردیم. ساکیتجَه اوتوروب اَللَریمی دیزلَریمین اوستونَه قویموشدوم. آتامین دؤیَجلَدییی کیبوردون سَسی بئینیمی دیشیردی... بارماقلاریم دیزلَریمی سیخدیقجا اَتیمین آغریسی ائله بیل او سَسی بیر آز آزالدیردی. مَن او سَسی ائشیتْمَه‌مَک اوچون او آندا اؤلمَیَه بئله حاضیر ایدیم.
آنام گوندوزدَن سونرا اَئودَن چیخمیشدی. گئج قاییتدی، آتام کینایَه ایله «ایندی گویا مَنی ماراقلاندیرماق ایستَه‌ییرسَن کی، سوروشوم هارادان گَلیْرسَن؟» دئییب یئنه دَه اَلینی بئلیْنَه قویوب خئیلی دانیشدی. آنام جاواب وئرمَه‌دی، مَنه «گئجَه‌نیز خئیرَه قالسین» دئییب هَمیشه یاتدیغی دیوانا اوزاندی.
گئجَه‌نی یاتا بیلمه‌دیم. آنامین نَفَسینی دینلَمَه‌یه باشلادیم. آتام هَله دَه کیبوردون دؤیَجله‌ییردی.
مَن ایچی قاپالی، نیفرَت دولو، هَر کَسَه پیسلیک ائتمَیَه حاضیر بیر بومبا کیمی دولاشیردیم. بوتون دونیانی اؤزومَه قوربان وئرْمَیَه حاضیر ایدیم.
آنام یئنه دَه مَنه قارشی دیقّتلی، قایغیکِش ایدی، آمما آرتیق آنامین گؤزلَرینده او سِئوگی یوخدو. داها ائوده اؤنکی کیمی داوا دا اولموردو. آتام ایستَه‌دییی واخت گَلیْر، آنام اوندان هئچ نَه سوروشموردو.
بو وضعیَت آتامین باشقا خُصوصیَت‌لَرینی اوزَه چیخاردی. غیری‌جِدی حَرَکَت‌لَر ائتمَیَه، بهانه توتماغا ، گویا آنامی سِئوْیرمیش کیمی، اونونلا مُناسبَتینی دوزَلتْمَیَه چالیشیرمیش کیمی داورانماغا باشلادی.
بوتون بونلاری ایزْلَدیکجَه بیر آندا اوندان هئچ قورخماماغا باشلادیم. بو حیس هَر گون بیر آز داها قانیمدان تَمیزلَندیکجَه آمانسیز بیرینَه چئوریلیردیم.
باخ او واخت مَن قورخونون خلاص گوجونو آنلاماغا باشلادیم...
-قورخونون خِلاص گوجو؟ نئجه اولور بو؟
-قورخونون بوتون دونیانی خِلاص ائتمَه‌سی کیمی. اتم سیلاحلارینین انسانلیغی خِلاص ائتمَه‌سی، مَثَلَن.
-نئجه یَعنی؟
اتم سیلاحی اولماسایدی، ایندی یئر اوزو یئنی‌دَن مُحارِبَه‌لَرین آلوویندا قوْرولوردو، اَمینَم. نییه ایندی دونیا مُحارِبَه‌سی اولمور؟ انسان دَییشیب؟ داها مَرحَمَتلی اولوب؟ یوخ، انسان یئنه اؤلدورور.
قاراباغدا تاپیلان عمومی مَزارلیق حاقّیندا ائشیتْمیشسیز، یَقین. ایگیرمی بیرینجی عصر و کوتلَوی مَزارلیق. بیز بئله شئیلَری تاریخ کیتابلارین‌دان اوخویوردوق، ائله دئییل‌می؟
آمما انسان یئنه دَه کؤتلَوی مَزارلیقلار سالا بیلیر. دوزدور، ایندی داها کیچیک میقیاسدا. ایشغال ائتمَک، اؤلدورمَک محللی اولوب.
26
نییه؟ چونکی قورخوروق. اتم سیلاحی ایچیمیزدَه ائله بیر قورخو یاراتمیشدی کی، بؤیوک دونیانین هانسیسا یئرینْدَه گئدَن ساواشدان اوزاق دورماغا چالیشیریق.
نییه؟ چونکی اتم سیلاحی آتیلسا، هامیمیز مَحْو اولاریق قورخوسو وار.
قورخو...
ایندی بؤیوک مُحارِبَه‌لَردَن قاچیشیمیزین سَبَبی قورخودور. اَوْوَلکینْدَن داها یاخشی اولدوغوموز اوچون یوخ، هَمین او بؤیوک قورخونون حسابینا یاخشی انسان، لیبرال، دِموکرات، مودارا اهلی اولا بیلیریک.
اَصلینده، مَن تَزَه بیر شئی دئمیرَم. دینلَرده جَهَننَمَه دوشمَه‌مَک اوچون یاخشی آدام اولماق شَرطی وار ها، اتم سیلاحی تهلوکه‌سینی دَه بونون دونیَوی نُسخَه‌سی کیمی دوشونون.
مَنی آتام کیمی اولماق قورخوسو یاخشی آدام ائدیردی. مَنی آتاما بَنزَمَکدَن او قورخو قورویوردو.
سَحَر آچیلیرْدی و مَن آرخایا یاسلانوب کافه‌نین گئنیش پَنجرَه‌سینْدَن ایچَری سوُزولن شَفَقین آیدینلیغیندا دَنیزَه گولومسَه‌دیم.
-بیز سَحَر یِئمه‌یی یِئیَه بیلَریک؟ مَن آجام، - دَنیزین سَسی بیر آز داها گؤمراه ایدی.
-اولار. سَحَر یِئمَه‌یی مَنیم اَن چوخ سِئوْدیییم‌دیر.
-سیزین دَه؟ آنام ائله گؤزَل سَحَر سُوفرَه‌لَری آچاردی کی...
-مَنیم دَه، - دئییب دوروخدوم.
مَندَه دَ اؤز حَیاتیمدان دانیشماق هَوَسی یارانْدیغینی حیس ائدیب، قاشلاریمی چاتدیم. صؤحبَتی دَییشمَک اوچون دَر حال آناسی حاقّیندا سوروشدوم.
-هَه، آنام... اونونلا داها چَتین ایدی. آناما اولان نیفرَتیمین کؤکونْدَه اونون عاجیزلییی دوروردو. آتامین اَصل اوزونو گؤرمَمَه‌سی، هَله دَه اوندان بیر گؤزلَنتیسی اولماسی مَنی آنامدان دا اوزاقلاشدیرمیشدی.
آمما تَمامَن باشقا بیر صورتلَه قارشیما چیخاندا بوشلوغا دوشدوم، چونکی اونا نیفرَت ائتمَک اوچون سَبَبیم قالمامیشدی.
آتام آنام اوچون یوخ اولدوقدا، آنامی یئنی‌دَن سِئوْمَیَه باشلاییرْدیم.
بیر آزدان اَئودَه یئنه داوالار باشلادی، بو دفعَه آتامین آنامی قیسقانماسینا گؤرَه. آنام اَئودَن چیخاندا گئییمینَه ایراد بیلدیریر، او بیر آز گئج قاییداندا «هارادایدین؟» دئییب باغیریردی.
بیر آخشام آتام اَئوه چوخ تئز گَلدی. عمومَن، سون واختلار داها گئج قالمیردی، کامپیوترین باشیندا دا چوخ اوتورموردو. حیس ائدیردیم کی، آناملا...
27
Post #30807
323