جعفر پورقاسم

منیم آنام

منیم آنام بیر ساوادسیز شاعیره دیر
او
باغچادا گیلاسلاری دره - درهَ
قیزیل گولو
مخمل اوسته سره - سرهَ
خرمن -خرمن ساچلارینی هؤره- هؤرهَ
شعییر قوشوب ، اوخویاردی .
او
بیر اینجه قیز گؤرنده
یا بیر گؤزل اوز گؤرنده
بیر جوت خومار گؤز گؤرنده
بعضی - بعضی آداملاری
قار گؤرنده ، بوز گؤرنده
قوشما قوشوب ، اوخویاردی .

گول آچاندا
سئوگی اونون دوداغیندا
قرنفیللر
آل اولاندا
یاناغیندا
سسله ننده شیرین نغمه قولاغیندا
قوشما قوشوب ، اوخویاردی .

اوخویاردی
نجابتی گؤرن زامان
قابالیقلار
قادینلارا
حؤکوم لرین سورَن زامان .

اوخویاردی اؤز - اؤزونه
گویدن  یاغیش یاغا - یاغا
قویونلاری ساغا - ساغا
هردن اوماج اوغا - اوغا
ساتاشاندا گؤزو داغا
سئله  ، سویا
گوله ، باغا
شعییر قوشوب اوخویاردی .

ایللر بویو من آنامی دینله میشم
آنام،
سؤزون مین بیر رنگلی ناخیشلارین
منیم بیاض یادداشیما
وورا - وورا اوخویاردی
منیم خیردا اوره ییمده
نغمه لرین چارداغینی
قورا - قورا
اوخویاردی .
حایف !!!
ایندی قوجالیبدیر
گاه اوخویور ، گاه اوخومور
ایندی ،
سؤزون ایپک شالین
قیریشلانمیش اللرینده
توتا بیلمیر .
گاه توخویور ، گاه توخومور

هردن
کئچن گونلرینی سالیر یادا
شعییر قوشور ، نغمه دئییر
سؤز یارییا یئتیشمه میش
قالانی نی یادیرقاییر
اللرین
قویور اوزونه
فیکیرله شیر اؤز - اؤزونه
منه دئییر :
نییه ایتیر سؤزلر منیم یادداشیمدان ؟؟؟

گؤزوم دولور
قولاغینا پیچیلدیرام ؛
گؤزل آنام !
هامی اینسان قوجالاندا بئله اولور.
ملول - ملول باخیر
دئییر :
دونیا بیزه وئردییینی بیر بیر آلیر
گونده بیزی آیری - آیری درده سالیر
بیر گون قالخمیر گویه قولوم
بیر گون توتمور سؤزو دیلیم
بیر گون گلمیر قیچیم ، بئلیم
چیخیر یاددان آییم ، ایلیم .

یئنه باخیر
دولور گؤزو
دئییر بالام :
بئله گئتسه توز اولارام
آغیز لاردا سؤز اولارام
چوخ اولمارام ، آز اولارام
یئرده قالمیش ایز اولارام
آمما من ،
او قیز اولمارام
بیرده من او قیز اولمارام


۲  ، ۶  ۱۴۰۵
https://t.me/Adabiyyatsevanlar