ویروس کیمی یوخ، عصب‌لیک، حیرصلنمک، رحمسیزلیک شَکیلینْدَه کِئچیرَندیرلَر.
بیزیم بیر-بیریمیزَه تَاثیریمیز وار، کوچَه‌دَن کئچَه‌نین بئله مَنه تَاثیری
23
وار. چونکی او گَرگین‌لییی، غضبی حیس ائدَنده مَندَه مُدافعه اولونماق احتیاجی یارانیر، بونا گؤرَه دَه داواملی شَکیلده اؤزونو قوروما مِکانیزمی قورماق اوچون ساواشیرام. ساواش مَنی یولوخدورور. مُباریزَه‌یَه یولوخدورور. مُباریزَه‌دَن یورولاندا‌سا غضبلَنیَرَم، بو غضبی بیر باشقاسینا اؤتورورَم.
مَن سوسماغی اؤیرَندیکجَه آنامدان اوزاقلاشیردیم. اَئودَه‌کی هَر داوادا آتامی گوناهکار بیلدیییم کیمی، آنامی دا عینى دَرجَه‌ده گوناهکار گؤرمَیَه باشلامیشدیم. آنامین اؤز هیجانلارینی ایدارَه ائده بیلمَه‌مَسی، آغلاماسی، قیشقیریغی مَندَه آرتیق اونا قارشی دا نیفرَت یاراتمیشدی.
هَر آخشام آتامین ایشدَن گَلیب قاپینی دؤیَه‌جَه‌یینی غضبله، اییرَنج بیر شئی باش وئرَه‌جَک‌میش کیمی، اورَه‌ییم بولانا-بولانا گؤزلَه‌ییردیم. بَعضَن حَتا قوسوردوم، آنام هَیَجانلانِیب مَنی حکیمَه آپاراجاغینی دئییردی. جاواب وئریردیم کی: «خَستَه دئییلم»، آردینی - «سیزَه گؤرَه‌دی» سؤزونو ایچیمده دئییردیم.
بیر گون دئدییینی ائلَه‌دی، مَنی مُعایینَه‌یَه آپاردی. بیر شئی دئییم. آنام نَه قَدَر گَرگین، عصبی، هیجانلی بیرینَه چئوریلمیش اولسا دا، مَنه اولان دیقّتی‌نی آزالتمامیشدی. یئنه صینفده اَن تَمیز، سَلیقَه‌لی، ذوقلو گئیینَن مَن ایدیم، یئنه هَر گون ایستَه‌دیییم یئمَکلَری بیشیریردی، یئنه هَر گون مَنیمْلَه صؤحبَت ائتمَه‌یَه چالیشیردی. آمما مَن آرتیق سوسموشدوم.
حکیم مَنه بیر خِئیلی داوا یازدی. گئری قاییداندا ماشینین گؤزگوسوندَه آناملا نَظَرلَریمیز قارشیلاشدی.
-داوا‌لارى ایچمَیَه‌جَک‌سَن؟
-اوندا نییه حکیمَه گَتیرْدین؟
- اَمین اولماق ایستَه‌دیم...
آنام دیقّتی‌نی یولا وئریب ائوین یولونو توتدو، سولا دؤنوب سُرَعتلَه دیکَه دوغرو سورمه‌یَه باشلادی.
-بیلمَک ایستَه‌دیم کی، فیزیکی ضرریمیز ده اولوبمو؟
سَسیندَه‌کی کَدَر مَنی یومشالتدی، اونا نَسَه خُوش سؤز دئمَک ایستَه‌دیم. آمما سوسدوم.
او گون هَمیشه‌کیندن فَرقلی شئیلَر اولدو. بیز گَلندَه اَئودَه بیر قادین گؤردوک. بونو دئیَه‌جَم، آنجاق بو قَدَرینی. آنامین اوزُونون نئجه اَییلدیینی، گؤزلَرینین نَجه حَدَقَه‌سینْدَن چیخدیغینی، آتامین اوزُونَه تۆپوردویونو، قادینا اَئودَن چیخماسی اوچون نئجه ساکیتجه یول وئردیینی ایزْلَه‌دیم.
اوتاغیما کئچدیم. یاتاغیما توخونمادیم، اییرَندیم. بَلکه آتام او قادینلا مَنیم یاتاغیمدا یاتمیشدی؟ بونو دوشونَنده اورَه‌ییم داها چوخ بولانماغا باشلادی. آمما قوسمادیم.
یازی ماساما اَیلَشیب...
24
موسیقینین سَسینی داها دا آرتیردیم. سَس‌سیز فیلمی ایزْلَمَیَه باشلادیم. آتام قادین چیخان کیمی آنامین اوستونَه جومدو، ووروب یئره ییخدی، سونرا دا یومروقلاماغا باشلادی.
مَن دَهلیزَه آچیلان قاپیدان بوتون بونلاری ایزْلَدیکجَه بَعضَن گؤزلَریم یومولور، باشیم هئرلَنیر، حَرَکَت‌لَر یاواشلاییردی. سانکی گؤزَه‌گؤرونمَز اوپِراتور آغیر چَکیمَه کئچیریردی.
آنامین اوزوندَن قان آخماغا باشلامیشدی. او، آتامین یومروق‌لارینْدان خلاص اولماغا چالیشیردی. بیرآندا اونون مَنی آختاران گؤزلَرینی گؤردوم. یالواریش واریدی او گؤزلَرده، یاردیم اوموردو، ایمداد دیلَه‌ییردی. اونو یومروقلایان آدامدان خِلاص ائدَه بیلَه‌جَییمی بیلیردی. چونکی مَن آرايا گیریب آتاما قیشقیراندا او دایاناردی.
آمما بو دفعَه آنامین گؤزلَرینَه جاواب وئرْمَدیم. آلبینونی‌نین اَثرینْده‌کی ویولون اَن یوکسَک نوتدا اینلَه‌ییردی و مَن گؤزلَریمی یوموب آنامین گؤزلَریندن «گئتدیم».
«قاییداندا» آتام آنامی دؤیمَکدَن یورولوب یئنه هئچ نَه اولمامیش کیمی کامپیوترینین قارشیسیندا اوتورموشدو.
آنام اورتالیقدا گؤرونموردو، آخشاما دوغرو اوزَه چیخدی. دوداغی پارتلامیشدی، اوزو قانچیرمیشدی. او گوندَن سونرا آنام هَمیشه‌کی کیمی اولمادی. ائله مَنه موناسِبَتی دَه...
او گون مَن آنامی ایتیردیم. دوزدور، یئنه یاخشی یئدیردیردی، تَرتَمیز گَئییندیریردی. ظاهرَن هئچ نَه دَییشمَه‌میشدی یَعنی. آمما مَنه توخونماسی، باخماسی اؤنَکی کیمی دئییلدی. داها مَنیمْلَه صؤحبَت دَه ائتمیردی.
اونون یاردیم ایستَه‌یَن باخیشلاریندان یاییناندان سونرا ایچیمَه گوناه حیسّی دولموشدو. مَن آنامی یئنی‌دَن تاپماق ایستَه‌ییردیم. قاپیلدیغیم دویغو فیرتیناسینْدا سوورولوردوم، آز قالا هَر گون فَرقلی شئیلَر حیس ائدیب یاشاییردیم. کیم اولدوغومو، کیم اولاجاغیمی بیلمیردیم.
سَحَر آچیلیرْدی. ساحیلَه یوروشَه گَلَن آداملار سَس-کویلَه کافه‌یَه گیریر، اَساسَن چای سفارش ائدیرْدیلَر. گَلَن‌لَرین ایچیندَه قادینلارین آز اولماسی دیقّتی‌می چَکدی.
-آنانیزلا یئنی‌دَن باریشا بیلدیزمی؟ - مَن هَیَجانیمی گیزلَدیب سویوق سَسله سوروشدوم.
Post #30758
295