اورایا تَعجیلی یاردیم ماشینی(آمبولانس) گَلدی، سونرا طب ایشچیلَری خَرکدَه بیرینی دؤشوروب ماشینا طرَف گَتیرْدیلَر. بیز موسانی او آندا گؤردوک...
آیاق‌یالین و کؤینَک‌سیز ایدی. اَینینْدَه‌کی تر کوینه‌یین آشاغی‌سی جیریلیب دیزینَه قَدَر ساللانمیشدی. سونرا اونون آغلار سَسله «آنا» دئدیینی ائشیتدیک.
ائله بیل اورَه‌ییم بئینیمین ایچینْدَه دؤیونوردو، یا دا غضبدن زوغولداییرْدی، بیلمیرَم...
مَن مَفتیلَه یاخینلاشیب موسانی چاغیردیم. چئوریلیب باخدی، آمما جاواب وئرْمَه‌دی.
نَه اولدوغونو بیلیردیم. اَمین ایدیم کی آتاسی آنانی دا، موسانی دا دؤیوب. قادینا نَسَه خَطر یئتیرْدی دییه، خَستَه‌خانایا آپاریرلار.
- نئجه بئله اَمین اولا بیلَردیز آخی، ائوده بیرینَه باشقا بیر شئی دَه اولماق اولار. خَستَه‌لَنَه بیلَر، مَثَلَن. هَر کَسین حیکایه‌سی...
-یوخ، ائله حیکایه‌لَر وار کی، مَن اونلاری ایلک جوملَه‌سینْدَن تانییرام. او «بیرى واریدی، بیرى یوخ» جوملَه‌سی ناغیلا ایشارَه اولدوغو کیمی، مَن دَه بئله حیکایه‌لَرین هانسی کَلْمَه‌یلَه باشلادیغینی بیلیْرَم.
بو حیکایه‌لَر هَمیشه تَنهالیق، سوسقونلوق، کَدَر، غضبلَه باشلار. اَصلینده، اونلاری هئچ کِیم دانیشماق ایستَه‌مَز، اوتانار.
قادینلارین قارالان یئرلَرینَه قاپی دَیَر، اوشاقلارین آیاغی سُوروشوب قیریلار. بو حیکایه‌لَر بئله‌دیر.
آمما بو حیکایه‌دَه موسانین آتاسی خَیالی دئییلدی، تَمام گَرچَکدی. ناغیللارداکی دیولَر کیمی قابا، هوندور بیر آدامدی، ایری دوداقلاری واریدی.
سِئودا موعَللیمَه گؤدَکجَنی چَکیب موسانین اَینینْدَن چیخاردیغی گونون سَحَریسی اونون آتاسینی چاغیردی صینفَه. باش وئرَنلَردَه موسی گوناهکارمیش کیمی.
تَکلیکدَه-فیلان دا دانیشمادی، هامیمیزین یانیندا موسانین تَربیَه‌سیز اولدوغونو، اوشاقلارلا...
22
دالاشدیغینی دئدی. مَن غضبدَن اَسیرْدیم، آمما سوسوردوم. او آندا نَظَرلَریمْلَه سِئودا موعَللیمَه‌نی دؤیدویومو ظن ائدیردیم. ائله بیلیردیم کی، ایچیمدَه‌کی غضبی گؤزلَریمْدَه حیس ائدیب یالانلارینی بیتیرَه‌جَک. آمما او داوام ائتدی.
موسانین آتاسی سِئودا معَللیمَه‌یه قولاق آسا-آسا باشینی ییرغالاییردی. سونرا او دا دیللَندی. قالین سَسی، آغیر-آغیر دانیشماسی هامینی وَاهیمَه‌یه سالمیشدی.
-موسایا دئمیشَم کی، ائوه دؤیولوب گَلسَه، مَن دَه دؤیَه‌جَم. کیم بیرینی وورسا، ایکیسینی دَه او وورمالی‌دیر.
آمما...
مَنیم دئدیییم بودو، دَرس‌لَرینی اوخومور، سَن بیر اوچ یاز، بَسدی، آمما مَنیم تَربیَه‌مَه دَه قاریشما...
او، سِئودا معَللیمَه‌یه «سَن» دئیَه موراجیعت ائدیردی، اوزونده اعتیناسیز بیر ایفاده واریدی.
-اوچ یازمانیز اوچون نَه قَدَر لازیمدیر؟
-سیز نَه دانیشیرسیز؟! بورا مَکتَبدیر، بازار دئییل.
-بازاردی، مَنه ناغیل اوخوما.
سِئودا معَللیمَه قیپ‌قیرمیزی قیزارمیش، بوزوشوب یوماغا دؤنموشدو. آمما اونا یازیغیم گَلمیردی، حَتا بو حالا دوشمَه‌سینه ایچیمدَه سِئوینیرْدیم. جَزاسینی آلمیشدی، هرچَند بو جَزانین دَه اَذییَتینی موسی چَکَه‌جَکدی. بونو دوشونَنده قانیم قارالدی.
-مَن موسانی دؤیدوم. او مَنی دؤیمَه‌دی آمما، هئچ وورمادی دا، - ایلها‌م کیمینسَه گؤزلَمه‌دییی حالدا تَشَخخوصلَه دیللَندی.
سوسقونلوق چؤکدو، تَکجه ایلها‌م هیریلداییردی... اوزونده ییرتیجی بیر ایفاده واریدی. مَن یئنه اورَه‌ییمین بولاندیغینی حیس ائتدیم. دیشلَریمی آغرییانا قَدَر سیخدیم کی، فیکریم یایینسین.
موسانین آتاسینین اوزو اَییلدی؛ قالین، قارا دوداقلاری سَیریدی. کینایَه‌لی باخیشلاریلا اونا مئیدان اوخویان ایلها‌ما اوزون بیر نَظَر سالیب اؤنَه جومدو، بؤغازیندان یاپیشیب یوخاری قالدیرْدی، سونرا دا آردا پَرده‌لرین یانینا توللادی.
ایلها‌م دیوارا دَییب دوشدو. آیاغا قالخماق ایستَه‌یَنده بَدهیبت کیشی باشینین اوستونَو کَسدیریب اونو بیر دَه یوخاری قالدیرْدی، بو دفعَه موسانین آیاغینین آلتینا آتدی.
-بو کوچوْیَه جاواب وئره بیلمَه‌میسَن سَن؟ بو سَنی دؤیوب؟ - آتاسی موسانین اوزونَه شیللَه چَکدی.
هَر شئی ائله آنی اولموشدو کی، هامی آجیلیق ایچینده ایدی. موسایا دَیَن شیللَه‌دن سونرا تامام سوسقونلوق اولدو. ائله بیل کادر دوردو. نَفَسیمیزی بئله چَکمَیَه قورخورموش کیمی دونموشدوق.
-سیز روزهانین «پسیخی خَستَه‌خانالاریندا آغیللی اولماق باره‌سینده» مَقالَه‌سینی اوخوموسوز؟ اوردا پسیخیاتْر پسیخی خَستَه‌خانه‌لاریندا قویولان تَشخیص‌لَرَه شوبهه‌یله یاناشیر، آمما مَن عکسینی سورغولامیشدیم.
ساغلام دئدیییمیز، آرامیزدا گَزَن چوخ آدام اَصلینده پسیخی(روحی- روانی) خَستَه‌دیر. بَلکه بیزیم کیمی جَمعییَت‌لَرده، «دَلی» دامغاسی وورولماقدان هَله دَه قورخدوغوموز اؤلکَه‌ده خَستَه‌لَر راحاتلیقلا آرامیزدا دولاشیر و اؤز خَستَه‌لیک‌لَرینی باشقالارینا دا کِئچیرَندیرلَر.
Post #30757
301