حسین  عارف

شعیر دئییل‌می؟

مندن تزه شعیر خبر آلان دوست!
بس یازین گلمه‌سی شعیر دئییل‌می؟
گزمه‌یه چیخاندا چؤلون، چیمنیی،
اۆزونه گولمه‌سی شعیر دئییل‌می؟

یئنه گؤزوم قالیب باغچادا، باغدا،
مین-مین گول آچیلدی آراندا، داغدا.
ائیوانا اَییلن چارپاز بوداقدا،
بولبولون نغمه‌سی شعیر دئییل‌می؟

سئیر ائله حوسنونو گؤیده دورنانین،
قایادا ککلیگین، گؤلده صونانین!
آینابند اوتاقدا گلین آنامین،
شیرین لایلای سسی شعیر دئییل‌می؟

دره‌ده موْروق در، دؤشده چیه‌لک!
گاه یاغیش خوش گلیر، گاه سرین کولک.
یاش اؤتور، دوْیماییر دونیادان اورک،
یاشاماق هوسی شعیر دئییل‌می؟

کیم دئییر شعیرین مئیدانی داردیر؟
سونو گؤرونمه‌ین بیر ایلک‌باهاردیر.
نئچه کی حیات وار، شعیر ده واردیر،
حیاتین نفسی شعیر دئییل‌می؟

https://t.me/Adabiyyatsevanlar