کیان خیاو
هئی، سیزینله‌یم، ائشیدیرسینیزمی؟ منه بیر آز اینستاقرامدان دئییل، اینسانقرامدان دانیشین لوطفن!...
بو گونلر زامان سانکی کائوس ایچینده کئچیر. داها دانیشماق دا اولمور. او ایلکین اینسانلارین دانیشماق اؤزگورلویو ده ایتیب- باتمیش. بوتون دانیشما‌لارین ایچینه پول- پارا قونوسو گیریر سونوندا. یوخ، بؤیله بیر یاشام اولماز. اینسان سانکی بیر تئاتردا دوستاقدیر و سئن اوستونده‌کی اویونو ایستر- ایسته‌مز ایزله‌مک زوروندا‌دیر. هاوا یاشام تئوریلری‌یله، دونیاگؤروشلری‌یله، یانیلساما‌لارلا، ایلغیملارلا دولودور. هر کس اؤز یانیلساماسینی ساوونور. آرتیق بؤیوک اینسانلارین پروفایلینی گؤرمک اولمور. بو نسنه‌لرین قانیندا داها ایستیلیک قالماییب. دامارلاریندا قانی قالماییب بئله. آتار بیر دامار بئله یوخ گؤوده‌لرینده. اونسوز دا نسنه‌لر و اینسانلار تاااا اسکیدن بری بیربیرلرینین قانینی اممکده‌دیرلر. مودئرن یاشام اینسانی نئجه ده مئکانیک بیر دوزه‌نه سیخیشدیریرمیش! هر اینسان اؤز قویوسونا اؤز ایپی‌یله آسیلمیش بیر دورومدا‌دیر. نه گؤی اوزونون اویدورما ناغیللارینا اومود وار، نه یئر اوزونون ایچی بوش قهرمانلارینا. بو دورومدا، "اینستاقرامدا نه یازسام، یارارلی اولار؟" دئیه دوشونورم. و سوسورام. آغزیمدا بیر ساموئل بئکئت سسسیزلییی وار بو آن. هئی، سیزینله‌یم، ائشیدیرسینیزمی؟ منه بیر آز اینستاقرامدان دئییل، اینسانقرامدان دانیشین لوطفن!...
https://t.me
/Adabiyyatsevanlar
Post #30732
382