ــ آی باجی ، بیر ساکیت اول گؤروم ، هارادان گلیب هارا گئدیرسن ؟
کوپه گیرن قاری شیرین دیلینی ایشه ساالدی:
ــ کاسیب ، السیز ـ آیاق سیز آروادام . انصافلی آداملارین سوفره سیندن تؤکولنی یئییب بیر تهر دولانیرام . سحردن دیلیمه بیر پارچا چؤره ک دَیمه ییب . اوزاق یول گلیرم ... یولدان کئچنده بو سارایی گؤروب سئویندیم . گلدیم کی ، بلکه بیر لوخما چؤره ک وئرن انصافلی آدام تاپیلدی .
ننه کوپه گیره قاری نین قولونا گیریب سارایین پیلله لری یانینا گتیردی .
ــ چیخ یوخاری ، ــ دئدی . ــ ائله من ده تک داریخیرام . اؤزومه هم صؤحبت آختاریردیم .
کوپه گیرن قاری دئدی :
ــ باشینا دؤنوم ، من بو پیلله لری نئجه چیخیم . اولماز کی ، ائله بوردا اوتوراق ؟
ــ یوخ ، بورادا اولماز . چیخ یوخاری . داریخما بیر ـ بیر چیخارسان .
ننه کوپه گیرن قاری نین قولونا گیریب اونو بیر آیاق ـ بیر آیاق یوخاری چیخاردیب اؤز اوتاغینا آپاردی . قارشیسینا دادلی خورکلر قویوب دئدی :
ــ اوتانما ، دویونجا یئ . اوغلوم احمده دعا ائله کی ، خاطادان بلادان همیشه اوزاق اولسون . ائله بیل اؤز ائویندیر .
قاری آج گؤزلوکله یئمه یه باشلادی .
ــ اوخای ، گؤروم اوغلون احمدین همیشه سوفره سی دولو اولسون . آغزیم دادا گلدی .
کوپه گیرن قاری یئییب دویاندان سونرا راحات نفس آلدی. اصل مطلبه کئچمه یه تلسدی :
ــ یاخشی ، باجیلی ، آخی من بیلمه دیم کی ، بو سارای کیمیندیر ؟
ــ نَوه م اودونچو احمدین .
ــ اودونچو احمدین ؟ یوخ اینانا بیلمیرم !
ــ بو سارای منیم بالامین دیر .
ــ آخی ، اودونچو بئله سارای تیکدیره بیلمز .
ــ هئچ کیمه ديمه سن کی ؟ ــ ننه آغزینی کوپه گیرن قاری نین قولاغینا توتدو.
کوپه گیره قاری دئدی :
ــ نه دانیشیرسان ، آج قارین دویدورموسان ، هئچ سنین سیرینی اؤزگه سینه دئیرممی ؟
ننه اونون قولاغینا پیچیلدادی :
ــ احمد آغ دیوین سئحرینه صاحیب اولوب ، بیر سئحیرلی اوزویو وار . اوزویون تؤزونو سیلن کیمی بیر قارا اجینه اونون قوللوقوندا حاضیر اولوب دئییر :
تولکو ، تولکو قویروغوم ،
ندیر منه بویروغون ؟
احمد اوزویون طیلسیمینی اوخویوب اوره یینده کی نییتینی سؤیله ییر . اوساعات دا اونون آرزوسو یئرینه یئتیریلیر.
کوپه گیرن قاری اؤزونو عوام گؤسترمک اوچون دئدی :
ــ باجیلی ، باجیلی دردین آلیم ، اوزوک صاحیبینه دئ منه تزه بیر باشماق گتیرسین . باشماقلاریم جیریلیب آیاقلاریمدا دورمور .
ــ اوزوک احمدین بارماغیندادیر ، من اونا هئچ نه دئیه بیلمرم . باشماق ایسته سن ، آل منیم تزه باشماقلاریمی گؤتور اولسون سنین .
ــ چوخ ساغ اول ، آللاه نوه ن احمدی مین بوداق ائله سین . بس احمد بالامیز ایندی هارادادیر ؟
ــ اودور ، ائی ، سئوگیلیسی شاهانه نین یانیندا .
ــ باجیلی ، سوروشماق عاییب اولماسین ، شاهانه کیمدیر ؟ ننه یئنه آغزینی کوپه گیرن قاری نین قولاغینا توتاراق ، دئدی :
ــ هئچ کیمه دئمه سن کی ؟
ــ نه دانیشیرسان ، عزیز جانین اوچون آغزیمدان بیر سؤز ده چیخارمارام .
ــ شاهانه جیم ـ سیم پادشاهین قیزی دیر . احمد اونوآغ دیوین طیلسیمیندن خیلاص ائدیب . قیزدا عهد ائدیب کی ، کیم اونو طیلسیمدن خیلاص ائتسه اونون اولاجاق . ایندی شاهانه عهدینه دوز چیخیب ، احمد له قالیر . ساغلیق اولسا بو گون ـ صاباح تویلارینی ائده جَیَم . سنی ده تویا چاغیرارام .
آرتیق هاوا قارالیب چیراقلار یانمیشدی . کوپ قاریسی هئچ ندن خبری یوخوموش کیمی بیردن دیللندی :
ــ بئی ، باشیما خئییر ، باشیم صؤحبته قاریشیب ، گئجه دوشوب . بس من یازیق ایندی هارا گيدیم ، هارادا گئجه لَییم ؟
ننه اوره ک یوموشاقلیغی ایله دئدی :
ــ گئجه واختی هارا گئدجکسن . ائله بوراداجا یئر سالارام یاتاسان .
ــ آللاه سیزدن راضی اولسون . اوغلون احمدی گؤروم مین یاشاسین .
ننه کوپه گیرن قاری یا یئر سالدی .
ایلان ووران یاتسادا ، کوپه گیرن قاری یاتمادی . یورغانی باشینا چکیب یالاندان خورولدادی . گئجه دن خیلی کئچمیش آیاغا دوردو. ائیوانا چیخیب قاپی ـ باجانی بلدلدی . باخیب گؤردوکی ، احمد پنجره نین قارشیسیندا یاتیب . پنجره ده تای باتای آچیقدیر . بارماغینداکی اوزوک ایشیق ساچیر . چوخ گؤتور ـ قوی ائدندن سونرا ، پنجره یه چیخدی . تومانینین لیفه سیندن بیر چیمدیک بیهوش داری گؤتوروب احمدین بورنونا توتدو . احمد یئرینده قورجالانیب آسقیردی . بیهوش داری اؤز ایشینی گؤرن کیمی ، الینی اوزادیب یاواشجا اوزویو احمدین بارماغیندان چیخارتدی . پیلله لری ساکیتلیکله دوشوب حیطه ائندی . اوزویون توزونو سیلدی . اوساعات قارا اجیننه اونون قارشیسیندا باش اییب دئدی :
Post #30728
330