اوشاق ادبیاتی
۸
سئحیرلی اوزوک
سگگیزینجی ناغیل :
«کوپه گیرن قارینین کله یی »
یازان : علی صمدلی
کؤچورن : علی آغ گونئيلی ــ ابرازی
کتاب : ژنرالین اوشاقلیغی ) پووئست لر بؤلومو
(
سیم ــ جیم شاه نئچه واخت ایدی کی ، راحتلیق نه اولدوغونو بیلمیردی .گؤزونون آغی – قاراسی اولان قیزی شاهانه نین دردی اونا راحاتلیق ويرمیردی . اونون آتلیلاری ، شاه سارایینا قاییتماغا بئله قورخوردولار . جیم ـ سیم شاهین یئگانه اومیدی سارایین باش جادوکونو کوپه گیرن قاری یا قالمیشدی! جیم ـ سیم شاه قارینی چاغیریب دئدی :
ــ شاهانه نی تاپیب بورا گتیریب بؤیوک انعام آلمالیسان ، یادا بازار میدانیندا بوغازیندان آسیلمالیسان ! بونلاردان بیرینی سئچ !
کوپه گیرن قاری فال آچیب تاس قوردو باخیب گؤردو کی ، شاهانه احمدله بیر یئرده دیر . اؤزلری ده بیر گؤزل سارای دا . قاری فورصتی فؤوته وئرمه ییب کوپونه گیردی . دوز احمدین کؤماسینا کیمی دیغیرلاندی . حیَطه گیریب بیر نئچه یئردن خلوتی بؤیلاندی . گؤردو کی ، احمدین کوماسی یئرینده دیر . آنجاق اونون یانیندا بیر داشی قیزیلدان ، بیر داشی گوموشدن بیر سارای اوجالیب کی ، یئمه ، ایچمه ، گؤزه للییینه تاماشا ائله . کوپه گیرن قارینی تعجوب بورودو . او ، اوول کومادان باشلادی . باخیب گؤردو کی ، احمدین کؤهنه کوماسیندا ایکی کاسیب اوغلان بیر سوفره ده ناهار ائدیرلر. یازیق بیر گؤرکم آلاراق اونلارا یاناشدی :
ــ آی بالالار ، کیمسه سیز قاری یا کؤمک ائدین ، ــ دئدی .
کریم له یلیم آیاغا دوروب قاری یا یئر وئردیلر .
ــ بویور ، کاسیبین اولانیندان یئ ، ــ دئیه کریم اونو سوفره یه دعوت ائتدی . قاری شیرین دیلینی ایشه سالاراق سؤزه باشلادی:
ــ گؤروم سیزی نئینه ییم ، نئجه ائله ییم دئمََیه سیز ، اوچ گوندور دیلیمین آلتیندان بیر شئی کئچمیر .
قاری الینی سوفره یه اوزادیب ، آج گؤزلوکله یئمه یه باشلادی .
سلیم دئدی :
ــ آی ننه ، هارادان گلیب ، هارا گئدیرسن ؟
قاری دئدی :
ــ آی اوغول ، کیمسه سیز قاری یام . اونون ــ بونون سوفره سیندن تؤکولنلری یئییب دولانیرام . نه چوخ دونیادا سیزین کیمی یاخشی انسانلار ! آللاه عؤمرونوزو اوزون ائلسین . قاری آج گؤزلوکله یئیه ـ یئیه اطرافا بویلانیردی . بورادان احمدین سارایی آیدین گؤرونوردو .
قاری دئدی :
ــ آی اوغول ، او سارای کیمیندیر ؟
کریم دئدی :
ــ بیزیم دوستوموز اودونچو احمدین ساراییدیر .
قاری گولوب دئدی :
ــ دونیاسیندا اینانا بیلمرم . منی عوام گؤرمه یین اودونچونون دا بئله سارایی اولارمی هئچ جیم ــ سیم شاهین بئله گؤزه ل سارایی یوخدور . احمد بیر کاسیب اودونچو اولا- اولا بئله زنگین ساراییی نئجه تیکدیره بیلر ؟
ــ سلیم دئدی :
ــ بیز احمد له آغ دیوی محو ائتمیشسک . اونون بوتون طیلسیملرینه احمد صاحیب اولوب . طیلسیمین واسیطه سی ایله اوره ییندن نه کئچسه بیر گؤز قیرپیمیندا حاضیر اولور .
ــ یاخشی ، آی منیم بالالاریم ، احمد یاخشی دوست دورسا نییه سیزی بو کاسیب داخمادا قویوب ؟ یقین کی ، ائولَنیب ؟
کریم دئدی :
ــ احمد شاه قیزی شاهانه نی آغ دیوین طیلسیمیندن خلاص ائدیب . قیز آتاسی ائوینه گئتمه ییب بورادا قالدی . ایندی توی گؤزله نیلیر .
کوپه گیرن قاری بارماغینی دیشله ییب حریصلیکله اطرافا باخدی و دئدی :
ــ دئمک بئله ، بو سارای اودونچو احمدین ایمیش . گئدیم اونلاردان صاباحیم اوچون بیر پارچا چؤرک ایسته ییم . ائله بلکه رحملری گلدی ...
قاری آیاغا دوروب تلسیک گئتمک ایسته دی .
کریم دئدی :
ــ قاری ننه ، ايله بیزیم بو کاسیب کومامیزدا دا قالا بیلرسن .
ــ یوخ ، بالا ، سیزین یئرینیزی داریسقال ائلَیه بیلرم . قوی گئدیم .
قاری تلسیک حیطدن چیخدی . بیر باش احمدین سارایینا یاناشدی . باتماقدا اولان گونشین شفقلری قیزیل کرپیجلره دوشوب پاریلداییر ، آدامین گؤزلرینی قاماشدیریردی . احمدله شاهانه گون باتان طرفده کی ائیواندا اوتوروب چای ایچیردیلر . ننه حَیَطده کی باغچادا گزیشیب دینجَلیردی .
کوپه گیرن یاواش ـ یاواش گلیب ننه یه یاخینلاشدی . اونا چاتماغا آز قالمیش آیاغینی قصدن سکی داشینا توخوندوروب ییخیلدی :
ــ اوف ، اوف ، اوف ، وای قیچیم ، وای قیچیم !
ننه اونا طرف یویوروب کوپه گیرن قاری نین قولوندان یاپیشدی .:
ــ آی باجی ، قالخ گؤروم نه اولدو ؟
کوپه گیرن قاری اوفولدادی :
ــ آمان ، آمان ترپتمه ، قیچیم سیندی .
قاری زورلا سورونوب سکی داشینین اوستونده اوتوروب داها دا برکدن اوفولدادی . ننه ده اونون یانیندا ایلشدی . کوپ قاریسینا دا ائله بو لازیم ایدی . آرا وئرمه دن اوفولداییردی . بیر بالاجا ساکیتلشن کیمی ننه سوروشدو:
Post #30727
260