موسی هَمین گون دَه هئچ کیمْله دانیشمادی، آنجاق مَن غَریبَه بیر شَئیَه شاهد اولدوم. نَظَرلَرینی آشاغی دیکیب اوتورموش موسانین اوزونده خَفیف بیر تَبَسّوم واریدی. ایلک دفعه ایدی کی، اونو بئله گؤروردوم.

سَحَری گون صینفده‌کی اوشاقلار موسایا ساتاشمادیلار، هئچ کیم اونو ایتَه‌لییب گولمَدی. هَمیشه ماراقسیز کئچَن، هاوالار ایستیلَنندن بَری مَکتَبین آرخاسینداکی استادیومدا کئچدیییمیز ایدمان دَرسینده حَتا ماراقلی بیر حادثَه اولدو.

قیزلار اؤز آرا‌لارینا توپلاشیب نَسَه دانیشیردیلار، اوغلانلارسا فوتبال اویناماغا باشلادیلار. موسی دا بیزه قوشولدو، کیمسه دَه بونا اعتیراض ائتمَه‌دی. موسی ائله گؤزَل اویناییر‌دی کی، هامیمیز مات قالْمیشدیق. بو، ایدمان معَللیمه‌ینین دَه دیقّتی‌نی جَلب ائتدی، اونو یانینا چاغیریب هانسی‌سا اوشاق فوتبال کلوبونا گئدیب-گئتمَه‌دیینی سوروشدو.

موسانین اوزو هَیَجان‌دان قیزارمیشدی. بَلکه، ایلک دفعه ایدی کی، کیمسه اونو تَعریفلَه‌ییردی، تَقدیر ائدیردی؟ بیلمیرَم. چوخ خُوشبَخت گؤرونوردو. آمما هاوا ایستی، اوز-گؤزو تَر ایچینده اولسا دا، حتا فوتبال اوینایاندا دا گؤدَکجَنی چیخارمامیشدی.

نؤوبَتی دَرسیمیز رِیاضیات دَرسی ایدی. سِئودا معَللیمَه صینفَه گیریب هامیمیزی آجیقلی-آجیقلی سوزدو. ایلها‌م بو گون ساکیت و پَرت ایدی، مَنه دَه نیفرَتله باخیب فیس‌فیس ائدیردی، آمما اوندان قَطعی قورخموردوم.

موسایا باخدیم، هَله دَه اوزوندَن آخان تَری سیلیردی.

-سَن نییه بو گؤدَکجَنی چیخارمیرسان؟ تَر ایچیندَه‌سَن، لئش اییی گَلیر سَندَن، چیخار او جیندیری، - سِئودا معَللیمَه دَرسَه باشلامامیش قیشقیردی.

چیخار، دئدیم، - او بیر دَفعَه موسایا طرَف آتیلیب گؤدَکجَنی چَکیشدیرمَیَه باشلادی.


موسی اونون اَلیندن چیخماغا، گؤدَکجَه اَینینْدَه قالسین دییه بؤکولوب اؤزونو قوروماغا چالیشدیقجا، سِئودا معَللیمَه داها دا غضب‌لَنیردی.

چیخار بو جیندیری. صینفده بئله اوتورا بیلْمَزسَن.


حال‌بوکی صینف قیزدیرلمادیغی اوچون بیز بوتون قیشی پالتودا اوتورموشدوق. سِئودا موعَللیمَه ایستَدییینه نایل اولدو. گؤدَکجَنی موسانین اَینیدن چَکیب چیخاردی.

دَنیزین گؤزلَرینَه کؤلگَه چوکدو.
19

گؤدَکجَنین آلتیندا هئچ نَه یوخدو. موسانین چَلیمسیز، آریق، سُوموک‌لَری چیخمیش بَدَنی چیلپاقدی. او دایانمادان قیشقیریب آغلايیر، آنلاشیلماز سؤزلَر دئییردی. جیلیز، آریق بَدَنینی اَللَریله گیزلَتمَیَه چالیشیردی و اَن قورخولوسو دا او ایدی کی، بَدَنینْدَه تونْد بَنؤفشَه رَنگلی لَکه‌لَر واریدی. مَن اونلارین دؤیولمَه ایزلَری اولدوغونا اَمین ایدیم، چونکی آنامین دا بَدَنینْدَه بئله لَکه‌لَر اولوردو.


هَمین گونو تَمام خاطیرلامیرام، آمما اونودمادیم دا. موسانی مُدافعه ائتمه‌دیم. هئچ نَه ائتمَه‌دیم. باشیمی اَللَریمین آرا‌سینا آلیب گؤزلَریمی قارا آیاققابی‌لاریمین اوجونا دیکدیم، آنجاق آیاقلاریما باخدیم. سوسدوم. اوردا نَه آختاریردیم، هَمین آندا نَه حیس ائدیردیم، بونو ایندی دئیَه بیلمَه‌رَم، آمما مَنی اَزَن، بوتون سُوموک‌لَریمی قیریب تؤکَن بیر بوشلوغا دوشموشدوم و آیاقلاریمین اوجوندان آچیلان قارا دَلیک ائله بیل مَنی اودوردو.

او گون آخشام ائوده دَه داوا اولدو، او داوادا دا مَن آتامین قارشی‌سینا کئچیب اونو ایتَلَه‌مَدیم، آنامین مُدافعه‌سینه قالخْمادیم. آمما آنام بو دَفعَه دؤزمَدی، اَلیندَه‌کی بُولور گولدانی یئره چیرپیپ «بَسدیـر» دییه قیشقیردی. مَنسَه اوتاغیما کئچدیم. ساکیتجَه یاتاغیمین اوستونَه قالخیب دیوارا سؤیکَندیم، قولا‌قلیغیمی تاخیب گؤزلَریمی قارشیداکی دیوارا زیللَه‌ییب موسیقی دینلَمَیَه باشلادیم.

مَطبَخدَه داوا بؤیویوردو. مَنسَه گؤزلَریمی دیوارا زیللَه‌ییب اوتورماغا داوام ائدیردیم. ایندی دَه دیواردا بیر قارا دَلیک آچیلیب مَنی اودورْدو و صینفدَه‌کیندن فَرقلی اولاراق آغری حیس ائتمیردیم. بَدَنیم قارا دَلیک طرَفینْدَن اودولماغا آلیشْمیشدی.

سَحَر قالخیب آنامین بوینونداکی ایزلَری گؤرَندَه عذاب چَکدیم. اونون کوسکون و بیر آز دا غضبلی باخیشلارینی گؤردوم. بیلیردیم کی، آخشام آنام مَندَن اونو مُدافعه ائتمَه‌ییمی اوموب. ایچیمدَه هَم کینایَه قاریشمیش بیر غضب، هَم دَه سُوکوت واریدی. ائله بیل ایچیمدَه‌کی غضبی دَه سویودوب ساکیتلَشدیرمیشدیلَر. او گوندَن سونرا مَن او غضبین آغریسینی حیس ائتمَه‌دیم.

ائله بیل موسانین بَدَنینْدَه گؤردویوم بَنؤفشَه زولاقلار ایندی‌یه قَدَر بئینیمَه سیخیشمیش هَر شئیی قاریشدیرمیشدی. ایندی دؤیَن بیرینَه نَه قَدَر نیفرَت ائدیردیمسه، دؤیولَندَن دَه او قَدَر اییرَنیرْدیم. آنامدان، موسادان...