دَنیزین سَسی ائله بیر قویونون دیبیندن گَلدی. من گؤزومو گارسونون گَتیرمیش توند چای‌دان چَکیب اونا باخدیم. اَصلینده، صؤحبَتی تامام اوْلاراق هارا یؤنَلدیینی آنلاماماغیمدان یارانان غضب آنی اولموشدو. ایندی ایسه نییه مَنی سِئچدیینی دوشونوردوم؛ بئینیمده اوزوم حاقیندا، بَلکه ده ایلک دفعه «من نورمال آدامام‌می؟» سوالی یارانمیشدی.
آمما قابالیقدان تماما باشقا بیر شئی حیس ائتدیم. دَنیزین صؤحبَتی مَنی یورمامیشدی. حتا هئچ بیر سونلوغو دا اولمایاجاقدی، بَلکه. یا دا بوتون بونلاری مَنه نییه دانیشدیغینی آخیرا قَدَر آنلامایاجاقدیم.
تَکجه موسانین حیکایه‌سینین سونونو تَخمین ائده بیلَردیم. بَلکه، مَنیم ده اوخودوغوم مَکتَبده، صینیفده، یا دا بوتون مَکتَبلَرین بوتون صینفلَرینده بیر موسی واریدی؟ بَلکه، مَنیم ده دَنیزین حیکایه‌سینه بَنزَه‌یَن، بیتْمَه‌میش، سادَه‌جه بو شَهردَن گئتمَک‌له مصنوعی شَکیلده بیتیریلمیش بیر حیکایَه‌م واریدی.
بئینیم سُورعتله گئری، خاطیرَلَرَه جومدو، آتامین اوزونو گؤزومده جانلاندیرماغا چالیشدیم. و مَنه ائله گَلدی کی، آتام عینَن دَنیزین آتاسینا بَنزَه‌ییر.
17
بیر دفعه آنام منه دئمیشدی کی، اَطرافیندا گولوب-اَیلَنَن، یا دا هئچ بیر پروبلئمی، قایغی‌سی یوخموش کیمی گؤرونَن آداملارا باخیب اوزونو دونیانین اَن شانس‌سیز، اَن بَدبَخت آدامی اعلان ائتمَه‌یه تَلَسمَه. چونکی سَنین ده عینَن اونلار کیمی گولدوگون آنلار اولور، هَمین آنلاردا اونلار دا سَنی خُوشبَخت و قایغی‌سیز بیری حساب ائدیرلر.
-آنانیز دوز دئییب.
-بیلیرَم. آنام دا نورمال انسان دئییلدی، - گولومسَه‌دی. - بیلیْرسیز، نییه؟ مَن ائوده موسی حاقّیندا اونا دانیشاندا «قاریشما، سَنین نَه ایشینَه قالیب؟» دئمه‌دی. عکسینه، دئدی کی، بیر گون مَکتَبَه یولو دوشَنده مودیرله، صینف رَهبَری ایله ده اونون حاقّیندا دانیشاجاق. مَنه «قاپینی موسی سیندیرماییب» دئدیرَن هَم ده آنامدی. آنام اولماسایدی، او قَدَر جَسارتلی اولا بیلمَزدیم. او گون قاپینی ایلها‌مین قیرْدیغینی دئیَه‌نده هامیسینین نَفَسی توتولدو. سِئودا معَللیمَه‌نین گؤزلَری آز قالدی حَدَقَه‌سینْدَن چیخاجاقدی. آمما ایلها‌م مَنیم اوستومَه جوماندا باغیردی. ایلها‌مین مَنی وُورما‌سینا ایمکان وئرمَیه‌جَه‌یینی دَه بیلیردیم. نییه؟ چونکی آنام واریدی. ایلها‌م اوز عائیلَه‌سینین، مَنسه آنامین اوغلو ایدیم او آندا. باشا دوشورسوز؟
مَن آنلادیغیمی باشیملا تَصدیق ائدیب دیقّتله اونو دینلَمه‌یَه داوام ائتدیم.
-هاردان بیلیْرسَن ایلها‌م سیندیریب؟
یالان دئییر، موسی سِیندیریب!
مَن تلفونومو چیخاریب ایلها‌مین صینفده‌کی دیگَر ایکی شاگیردلا دانیشیغینین سَس یازیسینی آچدیم. اونلار قاپینی قیرماق اوچون پلان قوروردولار.
-عجَب کارآگاه ایمیشسیز، - گولوب باشیمی یاییندیر‌دیم.
-هَه، - دَنیز مَمنونلوقلا گولومسَه‌دی. - بایاق دا دئدیم آخی، شوبهه‌لَنمیشدیم. تَنَفّوسلاردا تلفونومون سَس قَیدینی آچیق قویوب چیخیر‌دیم صینفدَن. ائله دوشوندویوم کیمی دَه اولدو، بیر دفعه قاییدیب باخاندا گؤردوم کی، ایلها‌م، صالح، بیر دَه نِعمت موسانی نئجه شَرلَمَک باره‌سنده دانیشیبلار. سِئودا موعَللیم بالاجالاشیب یوماغا دؤنموشدو. دوز اونون گؤزونون ایچینه باخیر‌دیم. ایلها‌مین آناسی پَروانه‌سه مَنه زیللَمیشدی گؤزلَرینی. آمما مَن اونا باخماماق اوچون بوتون گوجومو سَفَربَر ائتمیشدیم. هَمین آندا اونا باخسایدیم، قایتاراجاغیما اَمین ایدیم. اورَه‌ییم مُحکَم بولانیر‌دی.
-یالان دانیشیرسان، مَنیم اوغلومون پَخیللیغینی چَکیْرسَن، - پَروانه مَنه هجوم چَکدی. سِئودا معَللیمَه یوخودان آییلمیش کیمی دیکسینیب اؤنَه آتیلدی. قورخودان دیزلَریم اَسیر‌دی. اوزومو توتولموش گؤستَرمَک اوچون بوتون گوجومو توپلامیشدیم.
18
پَروانه خانیم، ساکیت اولون. صاباح قاپینی دوزَلتدیرین، بو صؤحبَت دَه بوردا بیتسین، - سِئودا معَللیمَه بونو دئییب غضبلَه فیس‌فیس ائتدی.
پَروانه اؤنجه مَنه، سونرا دا موسایا نیفرَتله باخیب، ایلها‌ما باشی ایله «چیخ» ایشارَه‌سی وئریب، آردینجا اؤزو ده گئتدی. او آرا معَللیمَه‌میزی کینایَه ایله سوزمَیَه دَه واخت تاپدی. سِئودا معَللیمَه‌نین قاش‌قاباغی یئرله گئدیردی، غضبلی و چارَه‌سیز گؤرونوردو.
آرتیق پَروانه ایلها‌مین یارامازلیقلارینی اؤرت-باسدیر ائتمَه‌سی اوچون سِئودا معَللیمَه‌یه پول وئرمیَه‌جَک، اونا هَدیه‌لَر آلمایاجاقدی.
آمما مَنیم موسایلا باغلی ناراحاتلیغیم هَله بیتْمَه‌میشدی. بیلیردیم کی، اونو راحت بوراخمایاجاقدیلار. سِئودا معَللیمَه رُشوتدن محروم اولماسینین، پَروانه ایسه ایلها‌مین اعتباری‌نین یئرله بیر اولماسینین قیصاصینی اوندان آلماق ایستَیَه‌جَکدیلَر. موسی اونلار اوچون ضعیف حلقَه ایدی.
Post #30720
280