زرین رزندی(طناز)

بحمداللاه تورم دن،یئتیشدیک جانه،ایران دا

کوُنول اوُزگورلویه حسرت،باتیب آل قانه ایران دا

یانیر مللت گران لیقدان،دیلی توتمور فغان ائتسین

اوره ک لنمیر،قیام ائتمیر،یاتیبدیر یانه،ایران دا

سالیبدیر فتنه نی چنگیز کیمی ایرانه تحریم لر

داوا-درمان چوُنوبدور،خنجر بررانه،ایران دا


یومورتا دّر اولوب،اَتله-تویوق،لعل بدخشان دیر

دویو اغوا ائدیر مئیلی،اولوب فتانه،ایران دا

بو باش سیز مملکت،باش دان باشا-غارت دی-فحشادیر

باخ انصافه!دئییر:کافر یئتیب ایمانه،ایران دا

دئییرلر:سوس دانیشما،هر ایشه دورتوکجه باش سوخما

بلاشک مللت ایران،اولوب بیگانه ایران دا

اَده خلقین ائوین ییخدیز،داغیتدیز،تارومار ائتدیز

(سکندر)دن میراث قالمیر،بو قدر ویرانه،ایران دا

قودوز حئیوان روا بیلمیر،جفا وجوری حئیوانه

بو استبداد ندن اعمال اولور؟انسانه،ایران دا

دَوه تک خیخلانیب مللت،اویان لار دینمه قوی اویسون

عاغیللی ایش بیلن یوخدور،دورا عصیانه،ایران دا

اَیر اللر دویونننسه،بو سس سیزلیک هاوار اولسا

آتام ارواحی لوت رعیت،گلر زور-خانه،ایران دا

آییلسا خواب غفلت دن،ایگید سلطانا رحم ائتمز

ایچرلر زهری سلطانلیق،چاتار پایانه،ایران دا

دیلین لال اولسون آی(طناز)،شعرینله اغتشاش سالما

سنه دخلی نه دیر قالخا؟دلار میلیانه،ایران دا.

https://t.me/Adabiyyatsevanlar