سحرخیاوی

بیزیم یئرلرده!!

او سحر، نه آغاجلار آرا کوشولده‌دی
نه یارپاقلارین قولاغینا پیچیلدادی
نه ده اوستونه شئه قونموش گوللرله اؤپوشدو
ایتی باخیشلاری کوسموشدو پنجره‌لردن
سوراغینی جیویلده‌شن سئرچه‌لردن توتدوم
خبرسیزیدیلر!
اونو اینجه قاناد کپه‌نک‌لردن سوروشدوم
دینمه‌دیلر!
آنا تورپاقدان سوروشدوغومدا،
یایلیغی‌نین اوجو ایله گؤزلرینی سیلرکن، چیینی‌نی سیلکه‌له‌ییب هؤنکوردو!

او گون درین قویولار قازیلمیردی آیاقلاری آلتیندا!
پوسقوسوندا دورمامیشدی اَلی بالتالی کؤلگه‌لر!
درین دره‌لرین ناهامارلیغیندان
سالام- صالاواتلا
اللر اوستونده؛
شوش ذیروه‌لرین چیگنینه آپاریلدیغیندا
بیر آن‌دا هامی اوچون آریندی، تمیز اولدو!
نئجه ده عزیز اولدو!
کؤلگه‌سینی گولله‌‌له‌ین‌لر داها چوخ وایسیندیلار!
یولونا تیکان اَکَن‌لر مزارینا گول سَپدیلر!
گونش بارماغینی دیشله‌دی!
شاشیردی مین اوزلو آداملاردان!
هه، بیزیم یئرلرده بئله‌دیر،
اؤلمه‌یینجه دیریلمزسن قاداسی!

1405/5/11

https://t.me/Adabiyyatsevanlar