اوستاد «سؤنمز»دن استقبال
 ائلدار موغانلی

بیر گؤیرچین کیمی دنسیزله‌میشم
بولبولم یازدا چمنسیزله‌میشم
اوستاد کریم مشروطه‌چی(سؤنمز)
 
قاناد آچ ماوی سمادا یئنی‌دن،
نه روادیر بئله دنسیزله‌یه‌سن؟!
گؤزله‌ییر اوچماغینی شانلی وطن،
بو گئنیش دونیادا دنسیزله‌مه ‌سن!
 
قیشا خال سالمادادیر گوللو باهار،
اریییر داغلارین اوستونده‌کی قار؛
دویسا یاز عطرینی بولبول اوخویار
کؤنول آچ یازه چمنسیزله‌مه ‌سن!
 
ساچینا چوخلودا دن دوشسه اگر-
قایدادیر داغ باشینا قار تؤکولر؛
کؤنلونه قویما قونا غصه – کدر،
دؤز باهار عشقینه شنسیزله‌مه ‌سن!
 
سنی داغ ساندی بو اود یوردو آنان،
داغ کیمی ذیروه‌سی چن اولمالی‌سان؛
داغلارین هئیبتی‌دیر چن‌له دومان،
بئله چنسیزله‌مه، چنسیزله‌مه سن!
 
گل داریخما! گؤرونور «بابک» ایزی
اوجا داغلاردا سوراقلار او بیزی؛
اود دیاری ایسیدیر قلبیمیزی
«نبی»‌لر چوخدو ارنسیزله‌مه سن!
 
کؤکله‌نیب «جنگی»لر اوسته سازیمیز،
«چنلی بئل»دن اوجالیر آوازیمیز؛
سس وئریر «روشن»ه «خان ائیواز»یمیز،
بئله بیر صحنه‌ده تنسیزله‌مه سن!
 
بیر یانار داغ کیمی «سؤنمز»دی اودون،
بو یانار شعله‌نی هر دم قورودون؛
اؤلکه‌نی اود نفه‌سینله بورودون،
دردلی اولما و وطنسیزله‌مه سن!
دؤز باهار عشقینه شنسیزله‌مه ‌سن!
 
اردیبهشت 1366- تبریز


https://t.me/Adabiyyatsevanlar