مهدی میرزا رسولزاده

دوروم اوزه‏‌رلیگی ائیواندا یاندیریم گله‌سن؟
گزیم اوتاقلاری، تئزتئز دولاندیریم گله‌سن؟
 
دوروم گئدیم کوچه‌ده های سالیم کی یار یولدا؟
اینانمایانلاری زورلا ایناندیریم گله‌سن؟
 
دوروم آیا او قدر یالواریم کی تئز گئتسین؟
دان‌اولدوزون سنه خاطیر اویاندیریم گله‌سن؟
 
باهار گلنده دئمیشدین گلر کؤچن قوشلار
باهار گئدیر؟ نه دئییرسن؟ یوباندیریم گله‌سن؟
 
زامان گئجیکدی، ساعاتلار  داریخدیلار… نئیلیم؟
بوتون ساعاتلاری بیربیر دایاندیریم گله‌سن؟
 
و سن دئه … سن، کی اگر گلمه‌سن نه چاره قیلیم؟
دوزون دانیش! نئچه شعری اوتاندیریم گله‌سن؟

https://t.me/Adabiyyatsevanlar