سلیمان ثالث
اوندا شیرین اولاربو حیات منه
پالاز اولام یوخسول ائوه سالینام
قیصاص اولام ظالیم لردن آلینام
بیر ساز اولام مجلیس لرده چالینام
اوندا شیرین اولار بو حیات منه
باهار اولام قیش قهرینی چكنه
قووَت اولام خلقه روزی اكنه
مسلك اولام سینیق كونول تیكنه
اوندا شیرین اولار بو حیات منه
مژده اولام ایستكلی سی ایتنه
چشمه اولام سوسوز یرده بیتنه
چیراغ اولام ایشیق سالام وطنه
اوندا شیرین اولار بو حیات منه
بیر اود اولام جهالتی یاندیرام
قانمایانی دوشوندورم قاندیرام
یول هانسی دیر اركان نه دیر آندیرام
اوندا شیرین اولار بو حیات منه
گونش اولام هر نه بوز وار اریدم
بولبول اولام بایقوشلاری كیریدم
ریاكارین عومرون گونون چورودم
اوندا شیرین اولار بو حیات منه
جاهاز اولام یتیم قیزا گلینه
عصا اولام قوجالارین الینه
داراق اولام باجیلارین تلینه
اوندا شیرین اولار بو حیات منه
فرهاد كیمی چاپام اوجا داغلاری
باهار اولام گوللندیرم باغلاری
بیرلشدیرم قارالاری آغلاری
اوندا شیرین اولار بو حیات منه
آچار اولام قیفیل لانمیش دیللره
مرهم اولام قابار چالان اللره
جانلا باشلا قوللوق ائدم ائللره
اوندا شیرین اولار بو حیات منه
یولداش اولام آرزوسونا چاتانا
اولوم اولام اوز یوردونو ساتانا
زندان اولام دوست آراسی قاتانا
اوندا شیرین اولار بو حیات منه
قانادلی قوش اولام گویلره اوچام
گجه لر آی اولام یره نور ساچام
بیر نفر دمه یه چیلپاغام آجام
اوندا شیرین اولار بو حیات منه
جوهر اولام ائللر قانون یازالار
كولونگ اولام معدن لری قازالار
یایلاق اولام داریخانلار گزه لر
اوندا شیرین اولار بو حیات منه
قوناق گئده م اوزاق ائله اوبایا
ائللر منی بركده بوشدا سینایا
یاخشی اولسام پیس ده اولسام تانییا
اوندا شیرین اولار بو حیات منه
هر یرده وار اوچا ظولمون بناسی
سیلاح لارین باتا سسی صداسی
گوزل له شه یوردوموزون نماسی
اوندا شیرین اولار بو حیات منه
قویام خوشبخت لیگین تمل داشینی
آغلایان گوزلرین سیلم یاشینی
بُوز دومان آلماسا داغلار باشینی
اوندا شیرین اولار بو حیات منه
https://t.me/Adabiyyatsevanlar
Post #30577
566