— آها، یئنه گوناهکار من اولدوم؟ — آتامین حیددتلی سسی ائشیدیلدی.
— یوخ، رسول. دئمک ایسته‌ییردیم کی، او قویونو بلوم دوشوب اوردا بوغولسون دئیه قازمامیشدین. کاش کی، واختیندا دولدورایدین دئییرم.
جومعه گونو ایدی. یئنه ده آوتوبوسلا مکتبدن ائوه دؤنوردوک. آتام منی دیزلرینه یاخین توتوب چانتامی دا اؤزو گوتورموشدو. آوتوبوس بوش ایدی. آلتدان یوخاری آتاما باخدیم. آنامین گؤزلریندن فرقلی اولاراق آتامین کیچیک، بیر آز دا حیله‌گر گؤزلری واردی، قیرمیزی دامارلار گؤزونون آغینی آز قالا تام اؤرتموشدو. دوداقلاری بیر-بیرینه سیخیلمیشدی، ساغ طرفدن آلت دوداغی آزجا آشاغی دارتیلمیشدی. او آن منه ائله گلدی کی، کیمسه‌یه تله قوروب پیسلیک ائتمه‌یین یوللارینی فیکیرلشیر.
— نه باخیرسان؟ — آتام اوزونو چئویریب سوروشدو.
میزیلدانیب باشیمی آشاغی سالدیم. ائوه گئدن کیمی گوزگوده دیقّتله اؤزومه باخاجاقدیم، منیم گؤزلریم اونونکولارا بنزه‌میرمی؟- دئیه.
آتامین تلفونو زنگ چالدی. دوستو ایدی، آدینی دئیه‌نده تانیدیم. آمما آتام ندنسه منیمله اولدوغونو، ائوه گئتدیییمیزی دئمه‌دی.
— گنجلیک طرفده‌یم، — دئدی.
من کاریخیب آتامین اوزونه باخدیم. بیز یاشادیغیمیز قصبه‌نین ایچینده، آتامین گنجلیک دئدییی یئردن خئیلی اوزاق‌دا ایدیک.
10
آردی وار

https://t.me/Adabiyyatsevanlar