حیدر بیات


دئدی گئجه‌لر تبریز اویاقدیر
فقط
قورخموش اوشاق کیمی
یورغانی باشینا چکیب اؤزونو یوخویا وورور،
چوخداندیر گئجه‌لر
یوخو گؤزلرینه گیرمیر تبریزین.
دئدی: گوندوزلر تبریز اویاق دئییل
یوخودا یول یئریر
آلدادیر هامیمیزی.
هامیمیز تبریزیک
آینایا باخیب
اؤزوموزه یالان سؤیله‌ییریک.
دئدی،‌‌ یانی ایسته‌دی دئیه سؤزونون قالانینی
بیر آیاق سسی گلدی
یورغانینی باشینا چکیب اؤزونو یوخویا ووردو.

https://t.me/Adabiyyatsevanlar