علی رشتبری "قاییب "


هامی اؤزون تاپان زامان بیز ایتیردیک اؤزوموزو،
هامی سؤزون تاپان زامان بیز ایتیردیک سؤزوموزو،
هامی کؤزون یاخان زامان بیز سؤندوردوک کوزوموزو،
هامی گؤزون آچان زامان بیز باغلادیق گؤزوموزو،
اوندان باشقا نه ائشیتسن یالان قارداش یالان قارداش،
بودور بو گون بیزدن آلان  قارداش  آلان قارداش.

بیز کی اییه دورانمادیق زامانیندا واریمیزا،
دوز چیله‌دیک قیشین گونو گؤیدن یاغان قاریمیزا.
آنالارین بیشیردیگی چؤرک گلدی عاریمیزا،
اؤزگه کوتون سفره میزده وئردیک اوشاقلاریمیزا،
اودور سنه یاد اولوبدور بالان قارداش بالان قارداش،
بودور  بو گون بیزی بیزدن  آلان قارداش آلان قارداش.

بیزی یادا کؤله ائدن  اؤپدوگوموز یاد اللردیر،
«نؤکر ایشلر ارباب یئیر» کیمی اولان مثللردیر.
بیزی ییخان باشی سویوق گؤردوگوموز عمللردیر،
کندیمیزین خرمنینده قونشو یونان او وللردیر،
دئییل  چالان قلبیمیزی  ایلان قارداش ایلان قارداش،
بودور بو گون بیزی بیزدن آلان قارداش آلان قارداش.

قورتارانماز بیزی داها نه فضولی نه نسیمی!
بیزدن غیری آچان اولماز دویون دوشن بو طیلسیمی.
ایندی بَگلر چیخان واختی، کؤکلمه سن اگر سیمی،
قوشول قاییب کروانینا گئجه لر گل بایقوش کیمی،
آذربایجان وئرانلیغین اولان قارداش اولان قارداش،
بودور بو گون بیزی بیزدن آلان قارداش آلان قارداش

https://t.me/Adabiyyatsevanlar