ایلقار موذن‌زاده

اردبیل شعری

بیلینمزدیر اردبیلین هاواسی
بیرده گؤررسن کی یازدا قار یاغار
داغیلسادا قارانقوشون یوواسی
باغچالارین سوفره‌سینه بار یاغار

پیرَتمه‌لیک یوخلوغا آددیملاسا
کرپیجلرین دوداقلاری چاتلاسا
قهقهه‌نین بایدالاری دولماسا
یوخسول اومودلار دامینا وار یاغار

جالاندیرار بئینیمه نادیر شاهی
روس یوروشوندن چکر ایللر آهی
هینده قدر گئنیشله‌در درگاهی
و اوردولار اوستونه اووشار یاغار

یئددی گؤزون یاش باخیشیندان سئله
کؤرپو سالیر یئددی‌مین‌ایللیک ائله
لاپ آز قالیر داشلاری گلسین دیله
هر یانینا باخسان اوغوللار یاغار

بالیقلی چای قان ایچینده داشسادا
اللریمده قالخان قیلینج بوشسادا
شهرلرین قاپباجاسی آشسادا
او سنگرسیز کوچه‌یه دیوار یاغار

دولو وورموش او مئیوه‌سیز باغلارا
یالقیز آمانسیز بوغولان دیغلارا
باغریمیزین دیبینده‌کی چیغلارا
چیلله‌لی آخشاملارینا نار یاغار

دوشمن آیاق سالسا قیزیل‌باشلارا
«شهر یئری»نده یوروسه داشلارا
گؤی اوزوندن اجنبی اوباشلارا
ایلدیریملار قوشونوندان دار یاغار

آراتتا ائللرینده سولطانلارا
شیخ‌صفی‌ده قیزیلباش ائیوانلارا
ایکی قارداش ساواشسا فرمانلارا
نیسگیل اولار، کدرله‌نر، زار یاغار

بیلینمز کی اردبیلده هاوالار
پیراَت‌ملیکده گؤی اوزو قارالار
عالی‌قاپی‌نین کابوسلاری سارالار
یابانجی لشکرلره سردار یاغار

پِسکوییچ‌ین تالادیغی کیتابلار
غوربت الده واراق واراق قان‌آغلار
تاریخیمی اجنبی جیرمالاخلار
قورغو قورار، ایگیرمی یانوار یاغار

بو ایل قارین حسرتینده داغلارا
قارانلیغین کؤلگه‌سینده آغلارا
داریخدیران او اومودسوز چاغلارا
عهد اولونان سؤزلره ایلقار یاغار


۱۴۰۵/مرداد
#اردبیل_هفته_سی

https://t.me/Adabiyyatsevanlar