اوشاق ادبیاتی

۳
سئحیرلی اوزوک
 اوچونجی ناغیل : 
« ایلک گؤروش »
یازان : علی صمدلی
کؤچورن : علی آغ گونئيلی  ــ  ابرازی 
کتاب :‌ ژنرالین اوشاقلیغی ) پووئست لر بؤلومو )

احمده ائله گلیردی کی ، بو گون باشقا گونلره بنظمیر . هاوا داها ایشیقلی ، چیچکلر داها عطیرلی ایدی . قوشلار داها گؤزه ل اوخویوردولار . اونا ائله گلیردی کی ، هله ده پالید آغاجی نین بوداغینی قوجاقلاییب سئحیرلی بیر عالمه تاماشا ائدیر .او ، نئجه ده اینجه و ظریف ایدی. بلکه ا ، بیر خیال ایدی . بس او ، هارایا گئتدی . قیرخ اینجه بئللی قیز اؤز ظریف اللری اوستونده اونو هارایا اوچوردولار ؟ احمد خیاللارایچینده بیردن گؤزونو آچیب ، اؤزونو مئشه ده گؤردو ، بیر آغاج کسمیشدی کی، پلنگ نریلتیسی قیز قیشقیرتیسی ائشتدی . تئز سسه گلن طرفه قاچدی . پنجه سینی قیزین سینه سینه قویان پلنگین اوستونه نه واخت آتیلدیغینی اؤزوده بیلمه دی . الینین بیرینی پلنگین آلت چنه سینه او بیرینی ایسه اوست چنه سینه کئچیریب وار گوجوایله دارتدی . پلنگ آرخاسی اوسته ییخیلدی . احمد قولدان گوجلو ایدی . اؤزونو ایتیرمه دن پلنگله چارپیشیردی . پلنگ وار سسی ایله نریلده دی . آنجاق اونون آغزی آچیق اولدوغوندان ، بو نریلتی چوخ بوغوق ایدی . قیز آیاغا قالخیب ، بیر قدر گئری چکیلدی . بو قورخونج منظره نی گؤرممک اوچون اللری ایله اوزونو قاپادی . سینه سینده کی جایناق یئرلریندن سیزان قان اونون آغ ایپک دونوندا قیرمیزی ناخیشلار آچیردی ، قیز بارماغینین آراسیندان قورخا – قورخا باخیب گؤردوکی ، احمد پلنگین جایناقلاری آلتیندادیر. چیغیریب اؤزوندن گئتدی ، احمد پلنگین نفه سینی کسیب آیاغا قالخدی . قانلی اللری ایله آلنینین ترینی سیلدی . آلنی دا ، قوللاری کیمی آل – قان اولدو . سونرا قیزا طرف گئدیب اونو قوللاری اوستونه آلیدی . بیلیردی کی ، یاخیندا سرین بولاق وار . اونو بولاق باشینا آپاردی . اووجونو سو ایله دولدوروب قیزین اوستونه سپدی . قیز اؤزونه گلیب گؤزلرینی آچدی . 
یاواش سسله سوروشدو: 
ــ آمان،  من هاردایام؟
ــ  قورخما ، ــ دئیه احمد دیللندی . ـ  اؤزونو اله آل . 
ــ سن کیمسن ؟ 
ــ من، شاه قیزی شاهانه یم . 
احمد اونو تانیدی . یوخودا گؤردویو قیز ایدی . 
ــ بس بو جنگللیکده نه گزیرسن ؟ 
سحر تئزدن قیر قیزلا خال ــ خال مئشه سینه سئیره چیخمیشدیم . دایه می حیرصلندیرمک اوچون اونلاردان آرالاندیم . سونرا دا مئشه ده آزدیم بیرده گؤردوم کی ، پلنگ اوستومه آتیلدی . سونراسیندان خبریم اولمادی . 
ــ چوخ قورخدون ايله می ؟ 
ــ  البته . بس سن قورخمادین ؟ اؤزونو پلنگین اوستونه آتدین ؟ 
ــ من سنینین اوچون قورخدوم .
ــ سن بورادا نه ائدیردین ؟ 
ــ اودون قیریردیم .
ــ  اودونو نئیله ییرسن ؟ 
ــ آپاریب بازاردا ساتیب ، داری چؤره یی آلیرام . ننه م له اؤزومو دولاندیریرام . 
ــ داری چؤره یی نئجه اولور ؟ احمد دستمالا بوکولوب بیر پارچا داری چؤره یی چیخاریب شاهانییه وئردی . 
ــ  آل باخ ، داری چؤره یی دادلی اولور. 
ــ شاهانه چؤره یی آلیب دیشلدی . 
ــ چوخ دادلی دیر، ــ دئدی . ــ دایم هر گون منی یئمک اوچون دانلاییر . قارشیما یوز لؤیون خوره ک قویور . منده چاشیب قالیرام، بیلمیره م هانسیندان یئییم . سن تکجه داری چؤره یی ایله دولانیرسان . 
ــ تکجه چؤره ک له یاشاماق اولماز . من هم ده آرزولاریملا یاشاییرام ، ــ دئیه احمد جاواب وئردی .
شاهانه تعجوبله سوروشدو : 
ــ آرزو ندیر ؟ وئر اونودا دادیم باخیم . 
ــ بیلمیرسن ، آرزو ندیر؟ 
ــ بیرینجی دفعه دیرکی،  ائشیدیرم .
احمد دئدی : 
ــ باخ، مثلا ، من آرزو ائدیرم کی، ائله بیر ایتی قیلینجیم اولسون کی، هر شئیی کسیب توکه بیلسین . او ، قیلینج لا بوتون ظولم کارلاری ، قصب کارلاری ، ال چاتماز طیلیسیم لری محو ائده بیلیم !
ــ ماراقلی دیر ! داها نه آرزو ائدیرسن ؟ 
ــ آرزو ائدیرم کی، ننه مین سؤیله دیی ناغیللاردا اولدوغو کیمی ، سئحیرلی خالچام اولسون اوستونه چیخاندا ، منی ایسته دیییم یئره آپارسین . 
ــ من جییَز  هئچ نه آرزو ائده بیلمیرم ، ــ دئییب شاهانه دریندن کؤکس اؤتوردو . هر شئیی منه زورلا وئریرلر: یئمه یی ده ، تزه پالتاریدا .خالچانین اوستونده اوچماغی ایسه منده ایستردیم . ائله بیر خالچا اولا بیلمز ! 
ــ اولار، ــ دئیه احمد ایناملا جاواب وئردی . ــ  ننم جاوان یاشلاریندان الوان ناخیشلی بیر خالچا توخویور . بو خالچانین هر بیر ایلمه سی نین رنگینی بیر چیچکدن آلیر . بیر لقمان اونا دئییب کی ، یوزبیرینجی رنگین ایلمه سینی وورا بیلسن ، خالچا سئحیرلی اولاجاق ، سنی ایسته دییین یئرلره آپاراجاق .