اوشاق ادبیاتی

آلا جۆجه‌نین خاطره‌لریندن
 
 قورباغا یئریشی
 
✍️ یازان: نورالدین_مقدم ( آیدین دومان)
 
بیر گۆن یوْلداشلارێـملا بیرگه  بیر کؤلگه‌ده یێغیشیب، دئییب – گۆلمکده ایدیک. قارا جۆجه‌دن خبر یوْخ ایدی. بیر نئچه جۆجه اوْنو سوْراقلادێ، آنجاق کیمسه اوْنون هارا گئتدیڲینی گؤرمه‌میشدی.
 
بیرآزدان قارا جۆجه اوزاقدان گؤرۆندو! جۆجه‌لرین بیری: «اوْرا باخێن، قارا جۆجه گلیر.» – دئدی.
 
هامێ دؤنۆب اونا باخدێ. هامێمیز اوْنون گلیشیندن تعجّبلندیک. اوْ باشقا جۆر گلیردی! بیز اوْنون قارا جۆجه اوْلماسێنا شبهه‌لندیک. آمّا اوْ اؤزۆ ایدی.
 
اوْ آیاقلارێنی جۆتله‌ییب، آتێلا – آتێلا بیزه یاخێنلاشیردی. هامێ مات – مات اوْنون حرکتینی ایزله‌ییردی. جمعیمیزه قوْشولدوقدا دئدیم:
- هه  قارا! یئنه نه خبر؟ نه اوْلوب کی، یئریشینی دَڲیشمیسن؟ بیز، اوْنسوز دا بوردا دئییب – گۆلوردوک.  سن، بیزی گۆلدورمه‌ڲین لازم دڲیلدی.
 
تؤوشۆنو دره – دره دئدی:
- یوْخ آلا، گئتمیشدم گؤلۆن قێراغینا، اوْرادا  قورباغا چوْخ ایدی. قورباغانێ گؤرۆبسوز دا نئجه یئریییر! باخ، اوْنلار کیمی یئریمک ایستیردیم. سیز ده اوْنلار کیمی یئرییه بیلرسینیز می؟
 
- نییه یئرییه بیلمه‌ریک؟ نه‌دیر کی! هامێ اوْنلارێن یئریشینی گؤرۆروب.
 
- یاخشێ اوْندا گلین هامێلیقجا اوْجۆر یئرییه‌ک. بو،  بوگۆنکو اوْیونوموز اوْلسون.
 
هامێ بیر – بیری‌نین اۆزونه باخێب، یاخشێ... یاخشێ دئیه‌رک، بیر – بیریمیزین دالێنا دۆزولوب، قورباغالار کیمی  جۆت آیاقلێ آتێلیب دۆشوب، بیر نئچه ساعات باشێمیزی بو تازا اوْیونلا قاتدێـق.
 
*سون
https://t.me/Adabiyyatsevanlar