«من چییرتکه‌یم» دئدی.
«بیز پروانه‌لریک پروانه‌لر» دئدیلر.
چییرتکه‌نین مئهریبانلیغی اونلارا اینام وئردی. بوتون گونو بیر یئرده دولاشدیلار. چییرتکه حئیوانلاری، حشراتی اونلارا گؤستریب آدلارینی دئدی. بعضیلری‌یله تانیش ائتدی.
هاوا قارالاندا چییرتکه بیر چیچه‌یین دیبینده اؤزونه یئر ائله‌دی. پروانه‌لری ده چاغیردی. «گلین سیز ده یاتین» دئدی.
- بیز یاتمیریق - پروانه‌لر دئدیلر - گئتمه‌لیییک.
- هارا؟ - چییرتکه سوروشدو.
- اورا - پروانه‌لر آیی گؤستردیلر.
- آیا؟ - چییرتکه سوروشوب، دقیقلشدیردی - او آخی اوزاقدادی.
- اونون ایشیغی وار - پروانه‌لر دئدیلر - بیزه ایشیق لازیمدیر. ایشیق بیزی ایسیدیر.
چییرتکه بیر آز فیکیرلشدی.
- آی اوزاقدادی - دئدی - اورا چاتا بیلمزسینیز، گلین سیزی باشقا یئره آپاریم.
-توللانا - توللانا قاباغا دوشوب بلدچیلیک ائله‌دی. پروانه‌لر اونو ایزلدیلر. چییرتکه اونلاری بیر کومانین یانینا گتیردی. مئشه‌نین تالاسیندا آغاجدان تیکیلمیش بالاجا کوما ایدی. بیر قاپیسی، بیر پنجره‌سی واردی. قاباغیندا فنر یانیردی.
- بو، مئشه‌بیی‌نین ائویدی - چییرتکه دئدی - هر گئجه فنری یاندیریر
پروانه‌لر سئویندیلر. داها آیا اوچماغا احتیاج یوخ ایدی، آرزولادیقلاری ایشیغی، ایستیلییی تاپمیشدیلار.
چییرتکه اؤزونه یئر تاپیب یاتدی، پروانه‌لر سحره قدر فنرین باشینا دولاندیلار.
سحر آچیلاندا چییرتکه اویانیب گرنشدی. پروانه‌لر گول لچگینه قونوب دینجلرینی آلدیلار. آمّا مئشه‌بیی چیخیب فنری سؤندورمدی. عمومیّت‌له، کومادان هئچ کیم چیخمادی.
چییرتکه توللانیب پنجره‌یه قوندو، ایچری بویلاندی.
- هئچ کیم یوخدو - دئدی - مئشه‌بیی گئدیب.
- فنر یاناجاق - پروانه‌لر سئویندیلر - ایشیغیمیز سؤنمه‌یه‌جک.
کئفلری کؤکلدی. داها بوندان سونرا آیا اوچماغا احتیاج قالمیردی. گوندوز اوچون گونشلری واردی، گئجه اوچون فنرلری.
بوتون گونو چییرتکه ایله مئشه‌نی دولاشدیلار، تزه حشراتلارلا تانیش اولدولار، مئشه‌نین ایشیغیندان، ایستیلیییندن، رنگلریندن، سسلریندن، قوخولاریندان حظّ آلدیلار. گئجه دوشنده کومانین یانینا قاییتدیلار. چییرتکه دوننکی یئرینه کئچیب یاتدی، پروانه‌لر فنرین باشینا دولاندیلار.
نؤوبتی گونو ده قایغیسیز کئچیرتدیلر. حتی بو گون ایری بیر کپنکله ده تانیش اولدولار. کپنگین قارا قانادلارینین اوستونده توند نارینجی، قیرمیزی خاللار واردی. پروانه‌لر گؤزلرینی اوندان چکه بیلمیردیلر. گئجه دوشنده کپنگی ده اؤزلرییله چاغیردیلار، آمّا کپنک گلمه‌دی «- منه گوندوزون ایشیغی بسدیر» دئدی «- گئجه‌نین ایشیقلاری سیزین اولسون».
پروانه‌لرین کئفی پوزولسا دا، اعتراض ائتمه‌دیلر. چییرتکه‌یه قوشولوب کومایا قاییتدیلار. آمّا کومانین قاباغینداکی فنر یانمیردی!
گئجه‌نین ظولمتینه بورونموش کوما ایشیقسیز، چوخ میسکین گؤرونوردو. قارا شوشه‌سینده گئجه‌نین قارانلیغی عکس ائدن فنر یازیق - یازیق یئلله‌نیردی.
- ایشیق،سؤنوب - پروانه‌لر دئدیلر.
- یقین، یاغی قورتاریب - چییرتکه دئدی.
پروانه‌لر آیا باخدیلار. «دئیه‌سن آیا اوچمالی اولاجاغیق» دئدیلر.
- یوخ - چییرتکه دئدی - آی ال‌چاتمازدی، اونا یئتیشمک اولماز
- بس نه ائدک؟ - پروانه‌لر سوروشدولار - آی اوزاقدان بیزی ایسیتمیر.
چییرتکه بیر آز فیکیرلشدی «منی بوردا گؤزله‌یین» دئییب توللانا - توللانا گئتدی.
بیر آزدان قاییداندا یانیندا پروانه‌لرین ایندییه جن گؤرمه‌دییی بیر جوت حشره واردی.
- گؤزلرینیزی یومون - چییرتکه دئدی - من دئینده آچارسینیز.
پروانه‌لر گؤزلرینی یومدولار. بیر آز کئچندن سونرا چییرتکه،چ دئدی - آچین.
پروانه‌لر گؤزلرینی آچاندا سئوینجدن بیلمه‌دیلر نه ائتسینلر. فنر یانیردی!
- بونلار ایشیلداقوشلاردی - چییرتکه دئدی - گوندوزلر یاتیرلار، گئجه‌لر مئشه‌یه ایشیق سالیرلار. بوندان سونرا هر گئجه سیزین اوچون ایشیق سالاجاقلار.
پروانه‌لر ایشیلداقوشلارین آیدینلاتدیغی فنرین باشینا دولانماغا، رقص ائتمه‌یه باشلادیلار. «ایشیغینیز سؤنمه‌سین آی ایشیلداقوشلار!» دئدیلر.
پروانه‌لر ایشیق تاپدیقلارینا، چییرتکه پروانه‌لره ایشیق گتیردییینه، ایشیلداقوشلار ایسه ایشیقلارینین هدر گئتمه‌دییینه گؤره خوشبخت ایدی...
۳۱ مای ۲۰۲۶
https://t.me/Adabiyyatsevanlar
Post #30232
248