دونیانین ایشیقلاری
حئکایه
یازان «حمید پیری‌یئو»
کوچورن:ویداحشمتی
حاضیرلایان:ادبیات سئونلر
چوخ ایدیلر. اونلارلا، یوزلرله پروانه بیردن قاناد آچیب اوچوشماغا باشلادی.
دونیانین ایشیقلاری اونلاری حئیران ائتدی. ایشیق گؤیده‌کی بؤیوک نور توپاسی گونشدن گلیردی. ایستی ایشیق شوعالاری سولارین اوستونه دوشوب برق ووروردو. پروانه‌لرین گؤزونو قاماشدیریردی.
دونیانین رنگلری اونلاری حئیران ائتدی. اوتلار، چیچکلر، آغاجلار هره‌سی بیر رنگه چالیردی. ایشیق شوعالاری آلتیندا برق ووران سولار مئح تماسی‌یلا خفیف دالغالاناندا رنگدن-رنگه دوشوردو. اطراف یئددی رنگین مین‌بیر چالاریندا پروانه‌لره گولومسه‌ییردی.
دونیانین قوخولاری اونلاری حئیران ائتدی. هر اوتون، هر چیچه‌یین، هر آغاجین، حتی سولارین دا اؤزونه‌مخصوص قوخوسو واردی. آز قالیردی بو قوخولار پروانه‌لری بی‌هوش ائتسین.
دونیانین سسلری اونلاری حئیران ائتدی. قوشلارین، جیککیلتیسی، بیتکی‌لرین خیشیلتیسی، سولارین شاپپیلتیسی، هردن دجللیک ائدیب بیر آنلیق گوجله‌نن و تئز ده ساکیتلشیب حلیم-حلیم اسمه‌یه داوام ائدن مئحین اوغولتوسو اونلارین روحونو اوخشاییردی.
بیر جوت پروانه دسته‌دن آیریلیب ایشیغا، رنگلره، قوخولارا طرف اوچدو. قانادلارینی گونه وئردیلر، چیچکلرین ایچینه گیریب گول توزونا بولاشدیلار، رنگدن-رنگه قوخودان-قوخویا تلسدیلر.
نور توپاسی گونش یاواش-یاواش گؤی اوزوندن ائنمه‌یه، او ائندیکجه هاوا سویوماغا، رنگلر توتقونلاشماغا قوخولار اوزاقلاشماغا، سولار دونوقلاشماغا، سسلر اؤله‌زیمه‌یه باشلادی.
هاوا قارالاندا پروانه‌لر قورخدولار. دونیایا بو گون گلمیشدی بو بالاجا پروانه‌لر، هله دونیانی تانیمیردیلار. بیلمیردیلر گوندوزون یئرینی گئجه توتور و گئجه‌نین ده اؤز ایشیغی، اؤز رنگلری، اؤز قوخولاری، اؤز سسلری وار.
قارانلیق قاتیلاشاندا پروانه‌لرین جانینی آلان اوشوتمه چوخالدی. سویوقدان تیتره‌مه‌یه باشلادیلار. بیلمه‌دیلر نه ائتسینلر، نئجه قیزینسینلار.
سونرا بدیرلنمیش آی دوغدو، قلبیله‌نیب گؤی اوزونده گولومسمه‌یه باشلادی. پروانه‌لر گؤردولر کی، گؤی اوزونه باشقا بیر نور توپاسی چیخدی. آمّا بو، باخاندا گؤزلرینی قاماشدیرمیردی، اونلارا مئهریبانلیقلا گولومسه‌ییب ال یئلله‌دیردی.
آیین مئهریبانلیغی پروانه‌لرین اورگینی ایسیتدی. «اورا اوچاق» دئدیلر، «اونون یانینا گئدک» دئدیلر.
بیر جوت پروانه آیا طرف اوچماغا باشلادی. اوچدوقجا بدنلری قیزیشیر، داها دا هوسله اوچوردولار. اونلار ایشیغا اوچوردولار.
خئیلی اوچدولار، آمّا آی هله ده اوزاقدا ایدی. آی چوخ اوزاقدا ایدی. او قدر اوزاقدا ایدی کی، ائله بیل پروانه‌لر هئچ یئرلریندن ترپنمه‌میشدیلر. آیا طرف بیر قاناد دا چالمامیشدیلار.
بس بایاقدان اوچدوقلاری مسافه نئجه اولدو؟ بلکه، قارانلیقدا آزیب یولدان چیخمیشدیلار، دؤوره ووروب باشلادیقلاری یئره قاییتمیشدیلار!؟ یوخ، اولا بیلمز، آخی آی اونلارا بلدچیلیک ائدیردی. آی ایمکان وئرمزدی اونلار یولدان چیخا. نسه، یامان معمّالی ایدی بو. بو معمّانی اؤیرنمه‌یین بیر یولو واردی - آیا چاتماق. یئنه اوچدولار.
اوچا-اوچا مئشه‌یه گلیب چیخدیلار. اوچدوقجا گاه هوندور آغاجلارین ذیروه‌سینه قالخیر، گاه بیر آز ائنیب بوداقلارین آراسینا گیریردیلر. مئشه قارامات ایدی، نم ایدی، نمیشلیک قانادلارینا هوپوب سرعتلرینی آزالدیردی. مئشه‌نین سسلری واهیمه‌لی ایدی.
پروانه‌لر اوچدوقجا اوچور، آی اوزاقدا قالماغا داوام ائدیردی. دان سؤکولنه قدر اوچدولار. نئجه اولدوسا، آیی نظردن قاچیرتدیلار. بیر ده گؤردولر آی یوخا چیخدی. یئرینی بولانیق - بوزومتول ایشیق آلدی. گئتدیکجه ایشیغین رنگی دگیشدی. بوزلوق آغاردی، چؤهراییلاشدی، نارینجیلاشدی. اوفوقده گونش گؤرونمه‌یه باشلادی. گونش قالخیب گؤی اوزونده یئرینی آلدی، دونیانی حقیقی رنگلرینه یئددی رنگین مین بیر چالارینا بویادی.
پروانه‌لر مئشه‌ده دولاشماغا باشلادیلار. آشاغیدان ذیروه‌سی ذیروه‌سیندن دیبی گؤرونمه‌ین هوندور آغاجلارین آراسییلا اوچدولار، یورولاندا آغاجلارین مامیرلی گؤوده‌لرینه قونوب دینجلرینی آلدیلار. مئشه‌ده چوخلو حئیوانلار، حشرات، قوشلار واردی. آمّا پروانه‌لر اونلارا یاخینلاشماغا قورخور، آرالی اوچماغا چالیشیردیلار.
-اوچا اوچا گلیب بیر تالایا چیخدیلار. بو، تالادا یابانی گوللر آچیلمیشدی. رنگ به رنگ گوللر اونلارا گولومسه‌ییب مئهریبانلیق گؤستریردی.
گوللرین اوستونده اوچوشاندا چییرتکه ایله تانیش اولدولار. اصلینده، اونلار چییرتکه ایله یوخ، چییرتکه اونلارلا تانیش اولدو. پروانه‌لر گوللرین اوستونده اوچوشاندا بیر ده گؤردولر ایری بیر حشرات یئردن سیچراییب گولون گؤوده‌سینه قوندو، ماراقلا اونلارا باخماغا باشلادی.
Post #30231
271