"ویدا حشمتی " ادبیات سئونلر
ادبی خبر
«قوشلار داها قورخمورلار» رومانینین تقدیمات و تنقید مراسیمی
۱۴۰۵-جی ایل، ۳-جو آی آیینین ۲۵-ده، تبریز شهرینده «کیتاب موبادیله‌سی مرکزی»نده «بیرینجی کیتاب ایزی»، خانیم کبیری‌نین «قوشلار داها قورخمورلار» اثری اوچون خصوصی بیر مراسیم کئچیریلدی.
مراسمین ایلک بؤلومو، خانیم لیلا ذاکری و اونون رساملیق قروپونون «پارچا اوزرینده رسیم وورکشاپی» ایله باشلاندی. بو سوره‌جده، سؤزو گئدن رومانین، آقای میابلی‌نین سسی ایله حاضیرلانان صوتی کیتابی (سی‌دی) تقدیم اولوندو و رساملیق قروپو حیکایه‌نین مضمونوندان ایلهام آلاراق پارچالار اوزه‌رینده گؤزل اثرلر یاراتدیلار.
مراسمین ایکینجی بؤلومو، رومانین نقد و تحلیلی ایله داوام ائتدی. سمیرا تقی‌زاده‌نین آپاریجی‌لیغی ایله کئچیریلن بو بؤلومده، ایلک اولاراق خانیم فرانک فرید چیخیش ائتدی. او، خانیم کبیری‌نین یارادیجیلیغینا توخوناراق، یازیچینین دیلیمیزه و تاریخی کیملیگیمیزه وئردیگی دگرلری یوکسک سویه‌ده قییمتلندیردی.
سونرا خانیم کبیری، رومانین یازیلما پروسه‌سی و بو یولدا قارشیلاشدیغی چتینلیکلردن دانیشدی. دالیسیجا، رسول اسمعیلیان رومان حاقیندا اؤز تنقیدی باخیشلارینی اشتراکچیلارلا پایلاشدی. هابئله، خانیم ذکیه ذوالفقاری روماندا ایشلنن فولکلور سؤزلرینه و یازیچینین مدنیتیمیزه وئردیگی اؤنمه ایشاره ائتدی.
مراسمین باشقا بیر بؤلومونده، آقای سرابی‌نین گتیردیگی دگرلی هدیه، خانیم ذوالفقاری و دکتر شیری ایله تقدیم اولوندو. مراسمین سونوندا قاسم تورکان و قربان‌زاده جنابلاری رومانین تحلیلی و یازیچینین ادبی یارادیجیلیغی باره‌ده اؤز فیکیرلرینی بیلدیریلر.
بو مراسم، سمیرا تقی‌زاده‌نین «قوشلار داها قورخمورلار» رومانیندان سئچدیگی قیسا بیر بؤلومدن ایفاسی ایله باشا چاتدی.
https://t.me/Adabiyyatsevanlar
Post #30226
399