✍️ :ائلمان_موغانلی

یئر کوره‌سینی ساواش عطری بوروموشکن
گل بیز ده ساواشاق
سینیرلار اوچون یوخ
نفت اوچون ده یوخ
آماجیم،
گؤزلریوین امپراطورلوغونا شاهلانماق.
عؤمرومون گئجه گوندوزلرینی چالان
جان آلان باخیش‌لارینا فاتح‌ اولماق،
گولوشونون بوتون شهرلرینه‌ یییه‌لنمک.
و اوره‌ییوین باش کندینده
قورخو ایله هؤووشنه یئرینه،
بوتون کوچه‌لره سئوگی آغاجی اَکمک.
ایل لر بویو حسره‌تینی چکدیگیم اَل‌لرین
عؤمۆرلوک دوستاقلانمالی
اؤزو ده اَل لریمین آراسیندا.
ساواشی قازانان من اولارسام
هر سحر ایشه گئتمه‌میش
یوخولو‌ گؤزلریوین خومار باخیش‌لاریندان
منیم اوچون تیکه توتماغین گرک
و هر گون سحردن آخشاما
گولمه‌گه محکوم‌سان.


1405.03.18

https://t.me/Adabiyyatsevanlar