علی رشتبری" قاییب"

سن ده منیم کیمی وفاسیز چیخدین،
ائتمه دین مرحمت بیر جانا یوردوم،
یومدون گؤزلرینی ،چکدین اوخونو،
ساغا-سولا گلدی، هر یانا یوردوم.

بللیدیر هر نَیین دوز کئچمیشیندن،
کئچیبدیر یوز قوجا جاوان دیشیندن.
لذّت ده آلیبسان یقین ایشیندن،
وورموسان فینجانی فینجانا یوردوم.

هانی توی آخشامی میدان قورانلار؟
هانی بس یوللاری گزیب یورانلار؟
مسجد قاباغیندا دونن دورانلار،
بو گون قبرستاندا یان-یانا یوردوم.

دانیش گؤروم بو یول کیمین یولودور؟
سنه یول گؤسترن هانسی دلی‌دیر.
اینجیمه سؤزومدن قلبیم دولودور،
آی عزیز تورپاغیم آی سونا یوردوم!

بس نییه بو تهر توتدون دونیانی؟
کوسدوردون اؤزوندن هر بیر انسانی؟
دئ گؤروم اون یاشلی قاییب بس هانی؟
نئیله دین اونلاری آی آنا یوردوم؟!...

https://t.me/Adabiyyatsevanlar