‍ بەیان هات، کەڵەشێر قۆلنێ؟

دوکتر ڕەزا ئابی- ئیلام
#ئەنستیتو_زانست_زاگروس

کەڵەشێر کێ بەیان چەکی؟ دەێ زوڵمات تیەڵ بێ شوونە. مانگ هەم خوەێ دەمان شاریەو. ئاسارە چەم نیەپرتکنێ. هەفت‌ترووم ڕێ شاردگه‌ و  نوون دروو دێ.

کەڵەشێر بقۆلن کێ بەیان چەکی؟
دەێ تیەریکە شەو سەرد سقان سووزە کە گەماڵەل وەرد گورگەیل یەک گرتنە و لۆلێان دە نام دەروەن سیە دیاێ. ئاسمان کە هەر ساتێ چەن ئاسارە داجڕێ و خودا زانێ گیان کام بەشەر گرێ.

کەڵەشێر کێ بەیان چەکێ؟
ڕووژ دە وڵات بوو، دەنگ شەقەێ گاوس دە وڵات بپێچێ. زەق زۆل ڕیەنەیل گووش دنیا کەڕ بکەێ. کڵەشێر! دەنگ تاک‌تاککەر کەپوو هەم دەێ شەو بێ پامانە نیەڵاێ.  مەردم ڕێ گوم کردنە و شەو تیەریک و ڕێ دریژ و لۆلە لۆلان گورگەیل نام دەروەنەیل.

کەڵەشێر! ئمشەو مانگ هەم دە ئیمە تووریاگە. تۆەم ئاسارە دە ئاسمان بریاگە. بڕێ کشمات، بڕێ وریا، بڕێ نوون ڕیەنەیل بێ شوان، ڕاێ گورگ دنان هار دەن. کەڵەشێر بقۆلن ساوڵ شکیاگ دەس م دەرەقەت دنان تێژ گورگ هەڵەت نەێرێ. کوڵنگ پڕ دە ساوەیل بێ خاون، گەماڵەیل دەێ شەوە وەرد گورگ هامڕێ بۆنە.

کەڵەشێر! ئاگر کوانگ ئیمە هەم ئمشەو تاو نەێرێ، وەفر تا گووش چڵە هاتگە. تەماکوو باوگم تەمام بۆە وداڵگم هەزرەتمەن سووە...

کەڵەشێر! دەێ شەو بێ مانگەشەوە، مەردم رێ گوم کردنە و کەس سەر دە کەسێ نیەکیشێ و نەقڵ مەتەڵ چەن کوتەڵێ نیە. دەنگ هوورە دە ماڵ خاڵوو نیاێ و ماڵ کەێخودا بێ مێوانە.

کەڵەشێر بقۆلن تا بەیان بچەکێ. زووڵمەت بشکێ و قاڕەێ کوورپە وەرک گووش وڵات کەڕ بکەێ. گڕمەێ دێو و لۆلەێ گورگ دە وڵاتمان بووڕێ. دەنگ هوورەچڕ سەرکڵاوان دە وڵات خاسمان بپێچێ. لیسک خوەر هێز بگرێ و  گیانمان ئاز... .

وشەنامە:
- بەیان: پگاە،
- کەڵەشێر: نماد بیداری و پاکی در فرهنگ کوردی،
چه‌کی: شکفت، زد،
- نیەپرتگنێ: پلک نمی زند،
- هەفت ترووم: دب اکبر، ستارە‌ای برای جهت‌یابی،
- داجڕێ : فرو می غلتد،
- گاوس: مشک بزرگ از پوست گاو ساخته شده،
- کەپو: شاە بوم،
- ساوڵ: تفنگ سر پر،
- چڵە: چوبی که به عنوان ستون برای حفظ سیاه چادر استفاده می شود.

#کوردی_مێعیار_پێوەر
#دپارتمان_چیروک_داستان
#ئەنستیتو_زانست_زاگروس
@zanistzagros